Ekstradohet nga Italia në Kosovë një i kërkuar nga INTERPOL-i për falsifikim dokumentesh

I dyshuari ishte arrestuar nga autoritetet italiane në bazë të një letër-rreshtimi ndërkombëtar dhe pas ekstradimit u është dorëzuar organeve kompetente në Kosovë.

Një shtetas i Kosovës është ekstraduar nga Italia në Kosovë, pasi ishte arrestuar nga autoritetet italiane në bazë të një letër-rreshtimi ndërkombëtar të lëshuar përmes INTERPOL-it, transmeton albinfo.ch.

Policia e Kosovës ka njoftuar se ekstradimi është realizuar më 23 korrik 2026 nga Drejtoria për Bashkëpunim Ndërkombëtar Policor, në koordinim me njësitë përkatëse të Policisë së Kosovës dhe institucionet e drejtësisë.

Sipas njoftimit, i dyshuari kërkohej nga autoritetet kosovare për veprat penale “Falsifikim i dokumenteve” dhe “Keqpërdorim i pozitës dhe autoritetit zyrtar”, ndërsa kishte shmangur përballjen me drejtësinë.

“I dyshuari ishte arrestuar nga autoritetet italiane, ku kërkohej përmes INTERPOL-it me letër-rreshtim ndërkombëtar të lëshuar nga institucionet e drejtësisë së Kosovës për veprat penale ‘Falsifikim i dokumenteve’ dhe ‘Keqpërdorim i pozitës dhe autoritetit zyrtar’”, thuhet në njoftimin e Policisë, transmeton albinfo.ch.

Autoritetet bëjnë të ditur se ekstradimi është realizuar në përputhje me legjislacionin në fuqi dhe falë bashkëpunimit të ngushtë ndërmjet institucioneve të Kosovës dhe Italisë.

Pas kthimit në Kosovë, i dyshuari u është dorëzuar njësive kompetente të Policisë së Kosovës në Rajonin e Prishtinës për vazhdimin e procedurave të mëtejshme ligjore.

Policia e Kosovës theksoi se do të vazhdojë bashkëpunimin me partnerët vendorë dhe ndërkombëtarë për shkëmbimin e informacioneve, gjurmimin, arrestimin dhe luftimin e grupeve kriminale që veprojnë brenda dhe jashtë vendit. /Albinfo.ch

---