Fluksi i refugjatëve, rritet mbështetja për partitë kundër emigracionit

Në Austri, Partia e Lirisë e krahut të djathtë mund të fitojë për herë të parë në zgjedhjet lokale të 11 tetorit në Vjenë, e cila është qeverisur për dekada nga social-demokratët.

Mijëra refugjatë dhe emigrantë që kaluan kufijtë e Austrisë u mirëpritën fillimisht krahë hapur.

Por, me afrimin e zgjedhjeve lokale, politikanët e krahut të djathtë po përfitojnë prej frikës ndaj të huajve, shumica e të cilëve janë myslimanë.

Vjena, si shumë kryeqytete evropiane, krenohet me një trashëgimi të pasur kulturore, arkitekturore dhe historike, si dhe me diversitetin kulturor dhe politikat e majta.

Por, ashtu si në pjesën më të madhe të Evropës, politika po anon drejt së djathtës duke ngjallur shqetësim.

“Jemi të frikësuar për zgjedhjet që po afrojnë, pasi partia e krahut të djathtë gëzon popullaritet në Austrinë e sipërme. Ka mundësi të fitojnë dhe kjo na shqetëson,” thotë Ashley Winker, e organizatës së ndihmave për refugjatët, Treni i Shpresës, shkruan VoA përcjell albinfo.ch.

Partia e Lirisë thotë se do të mbrojë kulturën austriake dhe Evropën prej islamizimit dhe mesazhi i saj po zë vend.

Sondazhet tregojnë se janë në të njëjtin nivel popullariteti me social-demokratët, të cilët kanë qeverisur Vjenën që nga Lufta e Dytë Botërore.

Partitë e majta po reagojnë kundër mesazhit anti-islamik dhe anti-emigracion të Partisë së Lirisë.

Vjena ka diversitet të lartë dhe mirëpret miliona turistë çdo vit.

Rezultatet e këtyre zgjedhjeve mund të përcaktojnë nëse ajo do të jetë në gjendje të ruajë imazhin mikpritës.