Zvicra, së shpejti me koncept emergjent për refugjatët

Të premten, autoritetet federale dhe ato kantonale kanë diskutuar për skenarët emergjentë

Keystone

Numri në rritje i refugjatëve që vijnë në Zvicër ka sjellë autoritetet në një pozicion për të shqyrtuar aplikimin e konceptit emergjent të azilit.

Kryetari i Konferencës së drejtorëve të Policive Kantonale të Zvicrës, Hans-Jürg Kaiser ka thënë për radion SRF se në dritën e dyfishimit të numrit të azilkërkuesve në tetor në krahasim me shtatorin, një konept i tillë paraqitet i arsyeshëm.

Kaiser ka thënë se fluksi më i ri i refugjatëve po u shkakton telashe kantoneve për strehimin e azilkërkuesve. Dhe ky trend po vjen duke u rritur, ka tërhequr vërejtjen ai. Sipas tij në Gjermani ka një numër të madh refugjatësh nga Afganistani që nuk janë regjistruar fare dhe kjo tregon se marrëveshja e Dublinit nuk ka funksionuar.

Kjo për faktin se Dublini parasheh që refugjatët të kthehen në vendin e parë nënshkrues ku janë paraqitur fillimisht. Por nuk është e thjeshtë të identifkohen këto vende, ka thënë ai.

Të premten, autoritetet federale dhe ato kantonale kanë diskutuar për skenarët emergjentë por, Kaiser thotë se për të marrë ndonjë vendim konkret duhet pasur numrat e verifikuar.

Koncepti emergjent parasheh veç tjerash edhe ndërtimin e një shtabi të veçantë, të aftë për t`u ballafaquar me gjendjen. Kaiser ka thënë se do të ishte i kënaqur që brenda 14 ditëve të merren vendimet përkatëse.