Xhaka, prapë në shënjestër të Fiorentinës

Për më shumë se 46 vjet klubi italian Fiorentina pret për t’u shpallur kampion në Seria A. Këtë vit ata gjenden në vendin e tretë me vetëm dy pikë diferencë nga kryesuesi i tabelës dhe shanset për të fituar titullin për ekipin nga Firenca janë shumë të mëdha.
Për të përmbushur ëndrrën e tretë të kampionit në historinë e klubit, pronari i Fiorentinës është duke menduar që në afatin dimëror të sjellë energji të re në klub dhe të forcojë edhe më shumë ekipin e tij. Sipas gazetës “Gazzeta dello Sport”, në listën e të preferuarve të presidentit është edhe futbollisti i kombëtares shqiptare, Taulant Xhaka, shkruan blick.ch.

Sikur gjatë verës së kaluar, ish-trajneri i Bazelit dhe Xhakës, Paulo Sousa, provon edhe në këtë afat të bëjë një ofertë tjetër milionëshe për të sjellë Taulantin në Fiorentinë, i cili ka kontratë me Bazelin deri në vitin 2018. Por klubi i Bazelit ka vënë një vlerë prej 4-5 milionë euro për kartonin e Xhakës. “Unë nuk e di se çfarë ka në plan AC Fiorentina”, thotë drejtori sportiv i Bazelit, Georg Heitz. “Ne llogarisim në Xhakën edhe për gjysmën tjetër të sezonit”, përcjell albinfo.ch.

Sipas gazetës zvicerane, për 24-vjeçarin shqiptar gjithnjë e më shumë është duke u folur se ky mund të jetë sezoni i fundit që do të bartë fanellën e Bazelit, por në anën tjetër, ashtu si ish-trajneri i tij Sousa, edhe trajneri aktual Urs Fisher është një fans i madh i Xhakës.

Taulanti në dy ndeshjet që Bazeli i luajti kundër Fiorentinës në kuadër të kupës së Evropës gjatë tërë ndeshjeve shfaqi paraqitje të shkëlqyeshme në fushën e lojës dhe duket se i ka bindur krerët e klubit italian që të hapin “arkën” dhe të shpenzojnë për të sjellë Taulantin në ekipin e tyre.