AAK në konferencë nga Kuvendi: Nuk bëhemi pjesë e këtij komploti

Grupi parlamentar i AAK-së ka mbajtur një konferencë për media pak orë para përfundimit të afatit për zgjedhjen e presidentit.

Shefi i deputetëve të kësaj partie, Besnik Tahiri, ka akuzuar kryeministrin Albin Kurti dhe Lëvizjen Vetëvendosje për situatën e krijuar rreth këtij procesi. Ai ka thënë se AAK nuk do të përfshihet në atë që e ka quajtur “komplot” ndaj shtetit.

“Qysh flet një kryeministër që don me i dhënë zgjidhje Kosovës, por del e flet në media. Kjo nuk është asgjë tjetër përveç një tentimi për bartje të fajit”, ka deklaruar Tahiri.

Ndërkohë, deputeti Bekë Berisha ka thënë se veprimet e Kurtit tregojnë se zgjedhjet janë të pashmangshme. Sipas tij, çdo cenim i rendit kushtetues do të hasë në kundërshtim.

“Ky nuk ka me arritë me e shkatërru Kosovën. Le të bëjë hajgare, por nuk ka me i dalë ashtu si mendon”, ka thënë Berisha, duke kritikuar edhe mungesën e besimit në procesin e mbledhjes së nënshkrimeve.