Administrata e Qeverisë, në grevë për rritje pagash 

Këshilli grevist, përmes një komunikate për media, ka thënë se nga sot, 04 shtator 2018, greva fillon zyrtarisht dhe do të vazhdojë deri në përmbushjen e kërkesave të tyre legjitime

Një pjesë e administratës së kryeministrit të Kosovës, Ramush Haradinaj, ka vazhduar grevën edhe sot. Ata janë duke mbajtur grevën, për shkak të diskriminimit në paga, pasi sipas tyre, disa kanë marrë paga me rritje e disa prej tyre jo.

Këshilli grevist, përmes një komunikate për media, ka thënë se nga sot, 04 shtator 2018, greva fillon zyrtarisht dhe do të vazhdojë deri në përmbushjen e kërkesave të tyre legjitime.

“Ndarja dhe përfshirja e një pjese të stafit të Zyrës së Kryeministrit në vendimin për rritje të pagave, ka krijuar pabarazi në mirëfunksionimin e Zyrës së Kryeministrit, duke bërë që nëpunësit civilë, në kuadër të zyrave që janë pjesë e vendimit, të kenë dallime substanciale në paga nga nëpunësit e tjerë, përkundër faktit se në legjislacionin aktual duhet të trajtohemi barabartë”, thuhet në njoftim.

---