Agjencia Evropiane e Barnave po shqyrton ilaç të ri kundër Covid-19

Keystone

Agjencia Evropiane e Barnave (EMA) njoftoi se po shqyrton miratimin e një ilaçi tjetër kundër COVID-19.

“Kompania farmaceutike zvicerane “Roche” ka paraqitur një kërkesë për miratimin e trajtimit të saj të antitrupave Ronapreve”, tha EMA.

Ilaçi, që ka dy përbërës aktivë, casirivimab dhe imdevimab, ka për qëllim të trajtojë personat e moshës 12 vjeç e lart, të infektuar me COVID-19 dhe që janë në rrezik të lartë për të zhvilluar forma të rënda të infeksionit.

Përveç kësaj, sipas prodhuesve, ilaçi mund të përdoret edhe te personat që kanë një rrezik akut për t’u infektuar, për shembull, sepse jetojnë në një familje me një person të infektuar, raporton Dpa, përcjell Albinfo.ch.

Vetëm kohët e fundit, Organizata Botërore e Shëndetësisë (OBSH) rekomandoi përzierjen e antitrupave kazirivimab dhe imdevimab për parandalimin e formave të rënda të COVID-19 te pacientët në rrezik.

Në Gjermani, ky kombinim antitrupash përdoret tashmë në raste të veçanta për pacientët me koronavirus.

Deri më tani, vetëm ilaçi remdesivir është miratuar në BE si një ilaç i veçantë kundër koronavirusit të ri.