Alarm i rremë për bombë në Aeroport

Pas realizimit të kontrolleve dhe verifikimeve nga ana e njësiteve relevante policore dhe agjencive të tjera të sigurisë, nuk është gjetur ndonjë mjet shpërthyes, njofton Policia

Policia e Republikës së Kosovës kishte marrë informacion për dyshimin e një bombe në Aeroportin “Adem Jashari” në Prishtinë. Mirëpo pas ndërhyrjes së njësiteve relevante policore, nuk ishte gjetur ndonjë mjet shpërthyes, çka dëshmon se alarmi kishte qenë i rremë.

Sipas një informacioni zyrtar, pas mesditës, Policia e Kosovës ka pranuar një informacion të pakonfirmuar, se në Aeroport ka dyshime për mjet shpërthyes.

Pas kësaj informate, Policia ka ndërmarrë të gjitha veprimet e nevojshme policore, me qëllim të verifikimit dhe preventivës

 “Ju konfirmojmë se pas realizimit të kontrolleve dhe verifikimeve nga ana e njësiteve relevante policore dhe agjencive të tjera të sigurisë, nuk është gjetur ndonjë mjet shpërthyes”, njofton Policia.

 Ky operacion i kontrollit dhe verifikimit, siç thuhet, është realizuar në të gjitha zonat që i përkasin Aeroportit dhe ka rezultuar se nuk ka ndonjë mjet të dyshimtë shpërthyes, përderisa punët dhe aktivitetet e Aeroportit kanë qenë dhe janë duke u zhvilluar normalisht.