Ambasadori i Zvicrës kritikon për numrin e madh të veteranëve 

Ambasadori i Zvicrës në Kosovë, Jean-Hubert Lebet, ka kritikuar drejtuesit e institucioneve të Kosovës, duke thënë se nuk duhet të paguhen nga shteti veteranët e rrejshëm. Ai ka thënë se me ato para duhet të investohet në projekte qenësore për qytetarët. 

Në përurimin e ujësjellësit në disa fshatra të Skënderajt, ambasadori Lebet tha se Kosova ka më së shumti shërbyes civilë se të gjitha vendet e rajonit.  Ambasadori theksoi se nuk është normale që Qeveria e tij të financojë projekte të tilla, pasi tha se  Kosova ka para, por nuk duhet keqpërdorur ato, përcjell albinfo.ch.

Ai shtoi se vlera e projektit të ujësjellësit kushton 2.5 për qind të vlerës së ndarë për pensionet e veteranëve. Ka reaguar kryetari i Kuvendit të Kosovës, Kadri Veseli, i cili ka thënë se në vendin ku po përurohet ujësjellësi ka shumë luftëtarë të vërtetë. Prej sot 10 fshatra të komunës së Skenderajt: Çubrel, Klladërnicë, Kopiliq i Epërm, Kopiliq i Poshtëm, Kostërc, Rakinicë, Turiçevc, Tushilë, Vojnikë dhe Kërnicë janë bërë me ujësjellës. I gjithë projekti ka kushtuar 1 milion e 230 mijë euro.