Angelina Jolie viziton qytetin e vijës së parë të frontit, Kherson, në Ukrainë

Aktorja e njohur e Hollivudit, Angelina Jolie, ka vizituar një nga qytetet më të rrezikshme të vijës së parë të frontit në Ukrainë dhe një rajon fqinj, ku është takuar me personel mjekësor, vullnetarë dhe civilë që jetojnë nën sulme të vazhdueshme nga trupat ruse.

“Në një kohë kur qeveritë në mbarë botën po kthejnë shpinën ndaj mbrojtjes së civilëve, forca e këtyre njerëzve dhe mbështetja që i japin njëri-tjetrit është frymëzuese,” tha Jolie në një deklaratë të publikuar të enjten nga Fondacioni “Legacy of War”, i cili mbështeti vizitën e saj në Kherson dhe Mykolaiv.

Sipas fondacionit, Jolie vizitoi spitale dhe institucione arsimore që janë zhvendosur në bodrume për t’i shpëtuar sulmeve të pandërprera ajrore. Në fotografitë e publikuara, ajo shihet me jelek antiplumb në një bodrum dhe duke takuar fëmijë në një dhomë pa dritare, raporton reuters përcjell albinfo.ch.

“Banorët e Mykolaivit dhe Khersonit jetojnë çdo ditë me rrezik, por ata refuzojnë të dorëzohen,” tha Jolie.

Kherson, dikur me rreth 300,000 banorë, është qyteti më i madh që gjendet brenda rrezes së armëve ruse, duke e bërë atë një nga zonat më të rrezikshme në Ukrainë. Qyteti u pushtua nga forcat ruse në mars të vitit 2022 dhe qëndroi nën kontrollin e tyre për tetë muaj, derisa trupat ruse u tërhoqën përtej lumit Dnipro, ku ndodhen ende sot.

Një hetim i Kombeve të Bashkuara muajin e kaluar zbuloi se Rusia ka ndjekur civilët pranë vijës së frontit me dronë, duke i detyruar mijëra të largohen – një veprim që përbën krim kundër njerëzimit. Rusia mohon se synon civilët.

Zyrtarët lokalë njoftuan se ushtria ukrainase ka rrëzuar rreth 2,500 nga 2,646 dronët rusë të lëshuar drejt rajonit të Khersonit vetëm javën e kaluar.

“Jemi shumë mirënjohës për vizitën e (Jolie-s) dhe për faktin që njerëzit vijnë këtu,” tha Oleksandr Tolokonnikov, zëvendëskryetar i administratës rajonale të Khersonit, për televizionin shtetëror të Ukrainës.

“Ndonjëherë kemi ndjesinë se jemi harruar, por kjo vizitë tregon se nuk është kështu.”

Angelina Jolie kishte vizituar më parë Ukrainën në pranverën e vitit 2022, kur shkoi në qytetin perëndimor Lviv për t’u takuar me njerëzit e zhvendosur nga lufta.