Lajme

Arbër Bullakaj mban fjalim në “Vrapimin kundër racizmit”, në Cyrih

"Është e vështirë të besohet se 100 vjet më parë në Zvicër mund të natyralizoheshit pas 2 deri në 5 vitesh, ndërsa sot për këtë nevojiten të paktën 10 vjet"

Në “Vrapimin kundër Racizmit”, një manifestim sportiv dhe politik tradicional që mbahet në Cyrih, pjesëmarrësve u është drejtuar me një fjalim aktivisti i njohur  politik shqiptarozviceran, Arbër Bullakaj.

“Është kënaqësi e madhe për mua të kem rastin të flas kundër racizmit këtu, në Vrapimin kundër racizmit, sot. Të shohësh kaq shumë njerëz që bëjnë fushatë aktive kundër racizmit – kjo është e mrekullueshme! Sepse është shumë e rëndësishme të fokusohet vëmendja tek strukturat diskriminuese. Pa pushim. Po, për të treguar se këtu ekziston racizmi: Qoftë racizmi i përditshëm apo diskriminimi strukturor që shfaqet në fusha të ndryshme.

Një demokraci e vërtetë dhe liberale duhet të vërë gjithmonë në dyshim veten dhe të përmirësohet vazhdimisht. Ky vrapim është një shenjë e rëndësishme në këtë drejtim.
Në fusha të caktuara është gjithashtu e mundur të arrihen përmirësime”, ka thënë tutje Bullakaj, shkruan albinfo.ch. Por, ka theksuar ai, “në fusha të tjera, megjithatë, ne kemi bërë fatkeqësisht një hap prapa gjatë dekadave të fundit. Ky është një skandal. Dhe, një gjë që shumë nuk e dinë, nuk ka qenë gjithmonë kështu.

Nëse njëqind vjet më parë, natyralizimi konsiderohej si fillimi i procesit të integrimit, këtu, në Zvicër, sot ky është fundi, një lloj shpërblimi për sjelljen e mirë. Sikur njerëzit pa pasaportë zvicerane të ishin të gjithë fëmijë të cilëve nuk u besohet të votojnë.

Është e vështirë të besohet se 100 vjet më parë në Zvicër mund të natyralizoheshit pas 2 deri në 5 vitesh, ndërsa sot për këtë nevojiten të paktën 10 vjet – për refugjatët dhe personat e pranuar përkohësisht, sipas rregullit, madje shumë më tepër.

Pothuajse një e katërta e popullsisë është e përjashtuar (nga e drejta për të bashkëvendosur, votuar). 38% e popullsisë është me sfond migrimi. Mbi 12% kanë dikë në familjen e tyre i cili ka prejardhje migrimi. Së bashku kjo përbën mbi 50% të shoqërisë sonë. Shtrëngimi i ligjit dhe të drejtat tona civile janë diametralisht të kundërta me realitetin brenda popullsisë.

Për këtë arsye ne krijuam shoqatën “Aktion Vierviertel” (Aksioni katër të katërtat)”, ka theksuar Bullakaj duke prezantuar synimet e shoqatës në fjalë..

“Shoqata synon të ndihmojë Zvicrën të kalojë nga demokracia prej tri të katërtave në katër të katërtat. Në manifestin tonë për një të drejtë themelore për natyralizim, ne, si një lëvizje e shoqërisë civile me bazë të gjerë, kërkojmë ndryshimin e paradigmës në të drejtat civile.

Në terma konkretë, kjo do të thotë: Të gjithë ata që kanë jetuar në Zvicër për katër vjet duhet të kenë të drejtën e natyralizimit, pavarësisht nga statusi i tyre i qëndrimit. Fëmijët, prindërit e të cilëve kanë qenë banorë në Zvicër kur kanë lindur, gjithashtu duhet të marrin automatikisht shtetësinë zvicerane”, ka thënë veç tjerash Arbër Bullakaj në fjalimin e tij të mbajtur me rastin e “Vrapimit kundër racizmit”, në Cyrih.


LAJME INTERESANTE NGA INTERNETI