Arratiset kroatja nga një burg i Bernës

E veçanta në këtë mes është se opinioni është njoftuar për këtë arratisje vetëm të shtunën, pra 4 ditë pasi që ajo ka ndodhur

Një grua e re, e burgosur në burgun e grave në Hindelbank të Kantonit të Bernës ia ka dalë të arratisej të martën në mbrëmje. Ajo, një kroate në mes 30 dhe 40 vjeçare,  ishte ngjitur mbi murin me tela që shërben për siguri të burgut dhe kishte ikur tutje, në drejtim të panjohur. Vetëm një minutë pas ikjes së saj, ishte vënë re mungesa dhe ishte nisur ndjekja nga strukturat e brendshme të sigurisë së burgut, shkruan sda.ch.

E veçanta në këtë mes është se opinioni është njoftuar për këtë arratisje vetëm të shtunën, pra 4 ditë pasi që ajo ka ndodhur, transmeton albinfo.ch. Drejtoria e burgut e arsyeton mos dhënien e alarmit me faktin se e arratisura nuk përbën rrezik për popullatën. Ajo ka qenë duke e mbajtur burgun për vjedhje. Në raste të tilla nuk praktikohet informimi “aktiv” i opinionit.

Sipas drejtoreshës së këtij burgu, të vetmit për femra, muri  i sigurisë është i vjetruar dhe nuk përkon me kërkesat e sotme.