BBC shpall Granit Xhakën transferimin më të mirë të sezonit në Premier League

Kapiteni i Sunderlandit vazhdon të marrë vlerësime të mëdha pas një sezoni mbresëlënës në elitën angleze

Pak ditë pasi mediumi prestigjioz “The Athletic” e vlerësoi si transferimin më të mirë të Premier Leagues për edicionin 2025/26, kapiteni i Zvicrës, Granit Xhaka, ka marrë një tjetër vlerësim të madh, kësaj radhe nga BBC, transmeton albinfo.ch.

Mediumi britanik ka shpallur Xhakën si transferimin më të mirë të sezonit në elitën e futbollit anglez, pas votimit të realizuar nga analistët e futbollit të BBC-së.

“Rezultati pas votave të analistëve tanë është se Granit Xhaka e ka fituar çmimin e BBC-së si transferimi më i mirë i sezonit në Premier League”, shkroi BBC.

33-vjeçari u transferua te Sunderlandi verën e kaluar dhe shumë shpejt mori shiritin e kapitenit, duke u shndërruar në liderin kryesor të skuadrës.

Me paraqitje të qëndrueshme dhe ndikim të madh në lojën e ekipit, Xhaka ndihmoi Sunderlandin të sigurojë kualifikimin në Ligën e Evropës, ndërsa sezonin e mbylli me një gol dhe gjashtë asistime.

Në procesin e vlerësimit morën pjesë 96 analistë të futbollit të BBC-së, ndërsa çmimet u ndanë në 27 kategori të ndryshme që përfshijnë Premier League, Premiershipin skocez, futbollin e femrave dhe ligat e futbollit anglez.

Ndërkohë, futbollisti shqiptar Lorent Tolaj u përfshi në formacionin më të mirë të sezonit në kategorinë e tretë të futbollit anglez, pas një edicioni fantastik me Plymouthin, ku realizoi 22 gola dhe tetë asistime. Tolaj është cilësuar nga mediat angleze si “Haalandi i ri”./Albinfo.ch

---