BE: Marrëveshja e arritur është progres i rëndësishëm

Foto Ilustrim

Bashkimi Evropian ka njoftuar për takimin e sotëm në Bruksel, duke theksuar se pas një serie negociatash të udhëhequra nga i dërguari i posaçëm i BE-së, Miroslav Lajçak, kryenegociatorët e Kosovës dhe Serbisë, Besnik Bislimi dhe Petar Petkoviq, kanë arritur marrëveshje për Termat e Referencës për Komisionin e Përbashkët për Personat e Zhdukur.

Në njoftimin e Shërbimit të Jashtëm të Bashkimit Evropian, thuhet se ky komision do të krijohet në kuadër të Deklaratës për Personat e Zhdukur, e miratuar më 2 maj 2023, nga presidenti i Serbisë, Aleksander Vuçiq, dhe kryeministri i Kosovës, Albin Kurti.

Tutje theksohet se Komisioni i Përbashkët, i cili do të udhëhiqet nga Lajçak, ka si përgjegjësi mbikëqyrjen e zbatimit të Deklaratës për Personat e Zhdukur dhe do të monitorojë bashkëpunimin ndërmjet palëve në disa fusha kyçe:

Identifikimin e vendeve të varrimit dhe realizimin e ekskavimeve pasuese,

Qasjen në informacione të sakta dhe të besueshme, duke përfshirë përdorimin e të dhënave satelitore dhe teknologjive të avancuara për zbuluar varrezat masive,

Respektimin e të drejtave të familjeve të Personave të Zhdukur.

Përveç kësaj, Komisioni do të monitorojë dhe mbështesë Kosovën dhe Serbinë në përparimin e bashkëpunimit të tyre në kuadër të Grupit të Punuese të udhëhequr nga Komiteti Ndërkombëtar i Kryqit të Kuq (ICRC) për Personat e Zhdukur.

Bashkimi Evropian ka theksuar se Kosova dhe Serbia e kanë riafirmuar se çështja e Personave të Zhdukur është një çështje humanitare dhe ka theksuar nevojën urgjente për përpjekje shtesë për të sjellë një mbyllje për familjet e prekur dhe për komunitetin më të gjerë. Nga 6,065 rastet e personave të zhdukur gjatë periudhës 1 janar 1998 – 31 dhjetor 2000, 1,607 raste mbeten ende të pazgjidhura.

“BE-ja vlerëson të dyja palët për angazhimin dhe qasjen e tyre konstruktive, e cila bëri të mundur rezultatin e sotëm. Lehtësuesi i BE-së ftoi palët të emërojnë përfaqësuesit e tyre përkatës për takimin e parë deri në mes të janarit të vitit të ardhshëm, siç përcaktohet në Termat e Referencës”, thuhet më tej në komunikatë.

“Ky hap përpara është një progres i rëndësishëm në normalizimin e marrëdhënieve mes Kosovës dhe Serbisë dhe në zbatimin e marrëveshjes për Rrugën e Normalizimit të vitit 2023. Ky është një përfitim direkt për qytetarët e Kosovës dhe Serbisë, dhe BE-ja i inkurajon të dyja palët të fillojnë me zbatimin e plotë të marrëveshjes”, theksohet në komunikatë.