BE planifikon të pezullojë lëvizjen pa viza me Rusinë

Këtë vendim ministrat e jashtëm të BE-së planifikojnë ta marrin në një takim dy-ditor në Pragë që fillon të martën.

Bashkimi Evropian po planifikon ta mbështesë pezullimin e Marrëveshjes së Lehtësimit të Vizave të BE-së me Rusinë, për të kufizuar numrin e vizave të lëshuara për rusët.

Këtë vendim ministrat e jashtëm të BE-së planifikojnë ta marrin në një takim dyditor në Pragë që fillon të martën, raporton Financial Times, përcjell Albinfo.ch.

Një zyrtar i BE-së tha se është e papërshtatshme që turistët rusë, të ecin në qytetet tona. “Ne duhet t’i dërgojmë një sinjal popullatës ruse se kjo luftë është e papranueshme”, tha ai.

Plani për të pezulluar marrëveshjen e 2007-së kërkon fundin e trajtimit preferencial për rusët kur aplikojnë për të gjitha vizat e BE-së.

“Jemi në një situatë të jashtëzakonshme dhe kjo kërkon hapa të jashtëzakonshëm. Ne duam të shkojmë më tej se pezullimi i lehtësirave të vizave”, tha një zyrtar i lartë evropian.

Finlanda, Polonia dhe shtetet baltike në kufi me Rusinë kanë thënë se janë të përgatitur të ndalojnë rusët të hyjnë në territorin e tyre me viza turistike, duke përmendur përjashtimet e sigurisë kombëtare nga marrëveshja e Shengenit.

“Shpresoj se do të gjendet një zgjidhje e përbashkët evropiane se si të kufizohet ndjeshëm fluksi i turistëve rusë në Evropë”, tha ministri i Jashtëm lituanez, Gabrielius Landsbergis./Albinfo.ch

---