De Biasi gëzon simpatinë e shqiptarëve

Për shqiptarët unë jam Zoti”, ka thënë me shaka 59 vjeçari italian

Trajneri i Kombëtares Shqiptare, Gianni De Biasi në një reportazh për gazetën “Blick”, ka treguar për jetën e tij dhe sigurisht për kuqezinjtë që do të luajnë në Francë, shkruan albinfo.ch.

De Biasi e dha intervistën nga qyteti ku po qëndron aktualisht, në Koneljano. Ai ka treguar shumë gjëra rreth vetes, si ndihet në Shqipëri dhe sesi trajtohet nga ana e tifozëve kuq e zi. I pyetur sesi e kishte fituar shtetësinë shqiptare, De Biazi me batuta tregoi se kishte fituar tejet simpatinë e shqiptarëve. “Për shqiptarët unë jam Zoti”, ka thënë me shaka 59 vjeçari italian që drejton përfaqësuesen shqiptare të futbollit.

“Kur eci rrugëve të Tiranës njerëzit çuditen dhe janë të habitur sesi ka mundësi që unë eci vetëm pa truprojë rrugëve të kryeqytetit. Ata çuditen pasi janë mësuar nga diktatura që njerëzit publikë ti shohin vetëm në televizion”, deklaroi italiani.

Por ai shtoi se në Koneljano ku qëndron aktualisht ishte thjesht Gianni De Biasi dhe asgjë më shumë. Gjatë shkrimit, De Biasi i shëtiti gazetarët përgjatë qytetit të Koneljanos duke i treguar vreshtat, ullinjtë, por edhe shtëpinë e tij.

Në fund De Biasi mbylli me batutë dhe humor teksa tha se “Shqipëria do të fitojë pasi nga aty vijnë Obeliksi dhe Asteriksi”.