Demagogjia e lojërave të fatit

Selatin Kaqaniku nga shoqata “Konsumatori” thotë se konsumatori kosovar po mashtrohet nga marketing që po bëjnë kompanitë e ndryshme me lojërat e fatit

Me qëllim që të promovojnë produktet e tyre dhe të rrisin shitjen, shumë kompani kosovare kanë filluar të aplikojnë rrejshëm lojërat e fatit, duke premtuar premi nga veturat, pushime nëpër botë, pajisje telefonike e kompjuterike etj. Mirëpo organizatat që mbrojnë konsumatoret, këto lojëra i cilësojnë si mashtruese.  

Kryetari i Organizatës Joqeveritare “Konsumatori”, Selatin Kaqaniku thotë se konsumatori kosovar po mashtrohet nga ky marketing që po bëjnë kompanitë e ndryshme.

“Ne jemi dëshmitarë që nëpërmes reklamave në mediume elektronike dhe të shtypura shihen mashtrime që bëjnë kompanitë. Për shembull në disa raste thuhet se “nëse i blen dy gjera, i treti artikull është falas”, derisa në strukturën e çmimit të bie njëjtë sikur të blesh një apo dy apo tre dhe asgjë nuk është falë”, tha ai raporton REL.

“Këtu e shoh gjumin e thellë të institucioneve të shtetit që akoma nuk kanë marr mundin, interesimin gatishmërinë që konsumatorin, taksapaguesi ta informojë ta edukojnë që të mos bien pre e këtyre mashtrimeve”, deklaroi Kaçaniku.

Këto aktivitet marketingu të kompanive, ai i konsideron mashtrime që iu bëhen konsumatorit  në Kosovë. Sipas Kaçanikut, si dukuri ky mashtrim është mjaft shqetësues dhe po bëhet pa u inspektuar nga mekanizmat institucional.

Organizata “Konsumatori”, ka ftuar inspeksionet dhe prokuroritë, e në veçanti inspektorët e tregut, që t’i hetojnë këto aktivitete marketingu të kompanive, të cilat siç thekson Kaçaniku shprehin konkurrencë jo të drejtë.

Në anën tjetër, qytetarët e intervistuar thonë që shumë herë janë mashtruara nga kompanitë tregtare të cilat kanë pasur oferta të shumta marketingu për ulje të çmimeve apo edhe shpërblimeve.

Fadil Gashi, qytetar, thotë se nuk iu beson aspak marketingut që bëhet nga kompanitë tregtare. “Ne këtyre reklamave nuk iu besojmë fare. Këto reklama janë vetëm për përftime të atyre kompanive që i bëjnë ata për vete jo për konsumatorin. Janë gënjeshtra”, thotë Gashi.

Ngjashëm mendon edhe Vjollca Krasniqi. “Nuk janë të vërteta. Kur të shkon nuk është ai çmim, shkruajnë se janë 50 për qind më lirë që i bie gjysma, ndërkaq nuk janë ato çmime”, thotë ajo.

 Ndryshe, propaganda për lojërat e fatit është më shumë e pranishme gjatë muajve të verës. Duke filluar nga kompania telefonike IPKO, shumica e kompanive përdorin lojërat e fatit për shitje të produkteve. Edhe atëherë kur në televizione proklamohet fituesi, zakonisht ata janë të afërmit e pronarëve, të cilët merren vesh paraprakisht me “fituesin”.