Detaje mbi aksionin e sotëm në veri

Prokuroria ka njoftuar se te të dyshuarit janë gjetur armë pa leje dhe dëshmi të tjera, lidhur me këtë rast

Forcat speciale të Policisë së Kosovës ROSU kanë arrestuar sot në Mitrovicë katër persona, nën dyshimin se janë të përfshirë në vrasjen e politikanit serb, Oliver Ivanoviq.

Prokuroria ka njoftuar se te të dyshuarit janë gjetur armë pa leje dhe dëshmi të tjera lidhur me këtë rast.

Prokuroria Speciale ka dhënë detaje lidhur me aksionin e sotëm në veri, ku u arrestuan katër persona, si të dyshuar për vrasjen e politikanit serb, Oliver Ivanoviq, përcjell albinfo.ch.

Në Prokurori thonë se janë kontrolluar disa lokale dhe prona në pjesën veriore të Mitrovicës, për shkak se është vlerësuar se ka gjasa reale se në këto lokale, shtëpi dhe prona mund të zbulohen dhe të konfiskohen prova të rëndësishme për veprën penale.

Gjatë këtij aksioni “Policia e Kosovës ka gjetur armë pa leje dhe materie të tjera që përbëjnë veprën penale, për të cilën ndiqet sipas detyrës zyrtare”.

Ndërkohë, komandanti i KFOR-it, Vicenco Grasov, ka thënë se kanë qenë në dijeni për aksionin e Policisë së Kosovës në veri të Mitrovicës, nga i cili janë arrestuar katër persona. Ai ka thënë se tashmë janë duke e monitoruar situatën dhe gjithçka është e qetë.

Kryeministri i Kosovës, Ramush Haradinaj, ka shpjeguar se ky veprim policor ishte në pajtim të plotë me ligjin dhe se nuk ndërlidhet në asnjë mënyrë me asnjë zhvillim politik.

Derisa u ka bërë thirrje qytetarëve, subjekteve politike, kryetarëve të komunave, posaçërisht atyre që të kontribuojnë në mbajtjen dhe avancimin e qetësisë publike.

---