Dhoma e Përfaqësuesve pritet të hapë hetim për shkarkimin e presidentit amerikan

Kryetari i Dhomës së Përfaqësuesve, Kevin McCarthy, ka deklaruar sot se ka udhëzuar një komitet të Dhomës që të hapë zyrtarisht një hetim për gjykimin e presidentit amerikan, Joe Biden, lidhur me marrëveshjet biznesore të familjes së tij, raporton BBC, shkruan albinfo.ch. Njoftimi për nisjen e procedurave, i njohur atje si “impeachment”, vjen para zgjedhjeve presidenciale të vitit 2024.

Ai u shpreh se hetimi i Komitetit për Mbikëqyrje i Dhomës së Përfaqësuesve deri tani ka gjetur një “kulturë korrupsioni” përreth familjes Biden.

“Këto janë pretendime për shpërdorim të pushtetit, pengim dhe korrupsion dhe ato kërkojnë një hetim të mëtejmë nga Dhoma e Përfaqësuesve… Prandaj unë po e udhëzoj Komitetin e Dhomës për të hapur një hetim zyrtar për shkarkimin e presidentit Joe Biden”, tha republikani.

Nga Shtëpia e Bardhë e kanë cilësuar njoftimin për nisjen e hetimit si proces të motivuar politikisht.

“Kryetari McCarthy nuk duhej të binte nën presionin e anëtarëve të së djathtës, të cilët po kërcënojnë me mbylljen e Qeverisë nëse nuk nis gjykimi, pa prova, ndaj presidentit Biden. Pasojat për popullin amerikan janë shumë serioze”, ka thënë Ian Sams, zëdhënës i Shtëpisë së Bardhë.

---