Diaspora e interesuar për investime në Kosovë

Diaspora shqiptare është shumë e interesuar për të sjellë investime në Kosovës dhe kjo është parë edhe nga vizitat që i kanë pasur zyrtarët e qeverisë së Kosovës në vende të ndryshme të botës.

Avdyl Lipoveci, drejtor i Departamentit për Ruajtjen dhe Kultivimin e Arsimit dhe Kulturës në Diasporë, tha se investimet strategjike dhe kërkesat e diasporës duhet të kenë një trajtim më të veçantë dhe në këtë drejtim po punohet.

Ai ka folur edhe për prezantimin e Kosovës që i kanë bërë në Kanada, duke veçuar minierat e Kosovës. “Gjatë vizitës ministri (Dardan) Gashi ka prezantuar mundësitë e Kosovës për investimet kanadeze dhe pati interesim për këtë”, deklaroi ai për televizionin publik të Kosovës, përcjell albinfo.ch.

Lipoveci ka folur edhe për muajin nëntor që në Kanada do të jetë muaji i kulturës shqiptare. “Është vështirë të dihet se sa shqiptarë janë në Kanada, por është prej 10 mijë deri në 15 mijë”, tha ai.

Kurse për kushtet që i ka Kosova për investimet e huaja, ai bëri me dije se shteti i Kosovës po bënë lehtësira që ata të sjellin kapitalin e vet.