“Dönerët” në Zvicër nuk janë “hallall”

Sipas një njoftimi të hënën, ICCS ka ekzaminuar mostrat laboratorike të restoranteve më të frekuentuara të ushqimit të shpejtë “Takeaway” në nëntë qytete të Zvicrës

Një laborator i Bernës ka treguar se në shtatë prej njëzet mostrave të mishit të “donerit” zviceran është gjetur përmbajtje e mishit të derrit. Përqindja megjithatë ishte shumë e ulët. Një hulumtim i tillë vjen me kërkesë të Këshillit Islamik të Zvicrës (ICCS).

Sipas një njoftimi të hënën, ICCS ka ekzaminuar mostrat laboratorike të restoranteve më të frekuentuara të ushqimit të shpejtë “Takeaway” në nëntë qytete të Zvicrës. 

Mishi në këto restorante të ushqimit të shpejtë  nga Berna, Bieli, Lucerni, Gjeneva, Winterthuri dhe Kreuzlingeni ka një pjesë të mishit të derrit. Bëhet fjalë për një përqendrim prej më pak se 0.1 për qind.

“ICCS” prandaj mendon se mishi i derrit nuk ishte përzier me qëllim ose me vetëdije në “donerët” e Zvicrës. 

Megjithatë, ICCS ishte shqetësuar për këtë përzierje. Presidenti i ICCS-së, Nicolas Blancho, citohet të ketë thënë: “Kjo është thjesht një çmenduri”.

ICCS sipas njoftimit të hënën ka dyshuar për një kohë të gjatë që “donerët” zviceranë nuk janë gjithmonë pa mish derri që është i ndaluar për besimtarët myslimanë.

Për më tepër, ICCS kishte kërkuar një ekzaminim të donerëve, duke u nisur nga përvoja gjermane. Javën e kaluar televizioni gjerman “RTL” pas hetimeve të bëra në disa mostra të restoranteve të shqimit të shpejtë në Gjermani kishte konfirmuar praninë e mishit të derrit në “dönerët” gjermanë deri në shtatë për qind. 

Njerëz të ICCS-së, të cilët janë marrë me hulumtimin javën e fundit në nëntë qytete zvicerane kanë pyetur secilin prej pronarëve të restoranteve të ushqimit të shpejtë nëse mishi është “hallall”, d.m.th i përgatitur sipas rregullave të fesë islame.

Sipas të dhënave të kontrolleve, ICCS që nga fundi i vitit 2011 është duke shqyrtuar mundësinë për të lansuar ushqimet zvicerane “hallall”. 

Skandali evropian me mish kali ka nisur me zbulimin e mishit të kalit në ushqimet e gatshme me produkte mishi “lasagne”. Laboratorët  në disa vende evropiane kanë konfirmuar praninë e mishit të kalit në produktet e viçit, duke përfshirë edhe Zvicrën.

Diskutimet për deklarimin e rremë të prodhimeve të ushqimit po zgjerohen gjithnjë e më shumë.