Dy autorë shqiptarë vlerësohen në një konkurs ndërkombëtar letrar në Itali

Çmime për shkrimtarin nga Kosova Lan Qyqalla dhe poetin nga Shqipëria Nikollë Loka

Dy autorë shqiptarë janë vlerësuar me çmime në edicionin e shtatë të Konkursit Ndërkombëtar të Letërsisë dhe Arteve Pamore “Çfarë nuk di Kaini”, të organizuar nga Akademia e Arteve dhe Shkencave Filozofike në Bari, transmeton albinfo.ch.

Shkrimtari nga Kosova Lan Qyqalla fitoi Çmimin e Dytë në kategorinë e prozës së shkurtër për autorët që jetojnë jashtë Italisë, me tregimin “Femra që refuzoi të hesht”.

Ndërkohë, poeti nga Shqipëria Nikollë Loka u nderua me çmimin “Eccellenza Internazionale” në kategorinë e poezisë për autorët jashtë Italisë, për poezinë “Non osate!” (“Mos guxoni!”).

Sipas organizatorëve, veprat janë vlerësuar në mënyrë anonime, vetëm mbi bazën e titullit dhe përmbajtjes, duke garantuar një proces të drejtë dhe profesional të vlerësimit. Ky sukses konsiderohet një tjetër dëshmi e prezencës së vazhdueshme të letërsisë shqiptare në arenën ndërkombëtare. /Albinfo.ch

---