Edhe 53 milionë euro “Bechtel-Enka”-s për autostradën e Shkupit

Ministri i Infrastrukturës, Pal Lekaj, ka thënë në mbledhjen e Qeverisë se kjo po bëhet për shkak të dështimit të qeverisë së kaluar për t’ia paguar me rregull faturat konzorciumit

Qeveria e Kosovës ia ka ndarë 53 milionë euro shtesë Bechtel Enkas për ndërtimin e autostradës për në Shkup.

Ministri i Infrastrukturës, Pal Lekaj, ka thënë në mbledhjen e Qeverisë se kjo po bëhet për shkak të dështimit të qeverisë së kaluar për t’ia paguar me rregull faturat konzorciumit.

“Ata kanë kërkuar t’i paguajmë 63 milionë për shkak të mbajtjes së pajisjeve gjatë dhe shpenzimeve indirekte. Pas negociatave, kemi arritur të ulim shumën në 45 milionë euro, duke shtuar edhe 8 milionë euro të TVSh-së, në total 53 milionë euro”, ka thënë Lekaj.

Kryeministri e ka arsyetuar ndarjen e kësaj shume, duke thënë se më mirë është të ndahen këta milionë, sesa Qeveria të përballet me procese gjyqësore.