Elon Musk kritikon operacionet e shpëtimit të Medit për migrantët e financuar nga Gjermania

Miliarderi Elon Musk ka folur dje për politikën gjermane në një kohë të një debati të nxehtë mbi emigracionin në të gjithë Evropën, duke thënë se operacionet e shpëtimit të emigrantëve të financuara nga Berlini në Mesdhe mund të shihen si një “pushtim” i Italisë.

I lindur në Afrikën e Jugut, me kombësi kanadeze dhe jeton në Shtetet e Bashkuara të Amerikës, ai ka bërë thirrje për një fitore të partisë së ekstremit të djathtë AfD një javë përpara zgjedhjeve rajonale në dy shtete të mëdha gjermane.

Ndërsa ministria e jashtme gjermane u kundërpërgjigj, ai intensifikoi kritikat e tij, duke thënë se “nëse një qeveri në një demokraci shkon kundër vullnetit të popullit, ajo duhet të votohet”, shkruan TheLocal.de.

Përmes një postimi në rrjetin social “Twitter”, Musk shpërndau një postim ku shkruhej: “AfD fiton zgjedhjet për të ndaluar këtë vetëvrasje evropiane”.

Pyetjes së Musk nëse “publiku gjerman është i vetëdijshëm për këtë”, Ministria e Jashtme gjermane u përgjigj shkurt: “Po. Dhe kjo quhet shpëtimi i jetëve”.

Përgjigja e Ministrisë së Jashtme bëri që Musk të ashpërsonte kritikat e tij, duke shkruar në një postim tjetër herët të shtunën: “Sinqerisht, dyshoj se shumica e publikut gjerman e mbështet këtë.

“A keni bërë një sondazh? Sigurisht që është shkelje e sovranitetit të Italisë që Gjermania të transportojë një numër të madh emigrantësh të paligjshëm në tokën italiane? Ka atmosferë pushtimi”, shtoi përcjell albinfo.ch.

---