Emigrantët dërgojnë 414 miliardë dollarë në vendet e tyre

Më së shumti para nga mërgimtarët e vet ka marrë India, 70 miliardë dollarë. Në disa vende, remitencat përbëjnë 30 deri 50 për qind të brutoproduktit

Vazhdimisht vjen duke u rritur numri i migrantëve që punojnë jashtë vendit dhe dërgojnë para në shtëpitë e tyre në vendlindje. Sipas një llogarie të bërë nga Banka Botërore, gjatë këtij viti në këtë mënyrë janë derdhur 414 miliardë dollarë në vendet në zhvillim, që është 6 për qind më shumë se në vitin e kaluar.

Më së shumti para nga mërgimtarët e vet ka marrë India, gjithsej 70 miliardë dollarë. Pas saj për nga shuma e lartë e remitencave vijnë në radhë Filopinet, Meksika, Nigeria dhe Egjipti. Në disa vende të botës madje, si në Taxhikistan, Kirgistan, Nepal etj.,paratë nga dërgesat e emigrantëve përbëjnë 30 deri 50 për qind të brutoproduktit të vendit, thuhet në raportin që Banka Botërore e ka publikuar në kuadër të mbajtjes së asamblesë së përgjithshme të OKB-së.

OKB bën të ditur se aktualisht në botë llogaritet të jenë rreth 230 milionë emigrantë, që është pothuaj për një të katërtën më shumë se para dhjetë vitesh., shkruan srf.ch

Nisur nga rritja në vazhdimësi e numrit të punëtorëve jashtë vendit, në tri vitet e ardhshme pritet që shuma e përgjithshme e remitencave të tyre të kalojë shifrën prej mbi 500 miliardë dollarëve.