Futboll

FFK-ja njofton për biletat e ndeshjes kundër Çekisë

Kosova do ta zhvillojë ndeshjen vendimtare për fatin e saj në Grupin A kualifikues

Federata e Futbollit e Kosovës u ka kërkuar tifozëve që të mos bëjnë rezervime për ta përcjellë ndeshjen mes Çekisë dhe Kosovës, që do të zhvillohen më 14 nëntor në “Doosan Arena”, pasi që biletat janë të rezervuara për grupin e tifozëve “Dardanët”, sponsorët, bashkëpunëtorët, institucionet dhe familjarët e futbollistëve.

Kosova do ta zhvillojë ndeshjen vendimtare për fatin e saj në Grupin A kualifikues për Kampionatin Evropian 2020 më 14 nëntor në Çeki. Federata e Futbollit e Çekisë i ka ndarë 627 ulëse në “Doosan Arena” për tifozët e Kosovës, shkruan Gazeta Express.

Megjithatë, Federata e Futbollit e Kosovës ka njoftuar se këto bileta nuk do të mund të shiten për tifozët e shumtë të Kosovës, pasi që ato janë të ndara për grupin “Dardanët”, sponsorët, bashkëpunëtorët, institucionet dhe familjarët e futbollistëve percjell Albinfo.ch.

Njoftimi i plotë i FFK-së:

Duke kuptuar interesimin e jashtëzakonshëm të publikut dhe tifozëve për ta mbështetur Kombëtarën e Kosovës në sfidën më të rëndësishme deri tani, atë kundër Republikës Çeke, Federata e Futbollit e Kosovës me keqardhje të thellë është e detyruar t’ u bëjë thirrje tifozëve që të mos bëjnë rezervime për fluturime dhe hotele, për shkak të numrit jashtëzakonisht të vogël të biletave që FFK-ja ka në dispozicion për këtë ndeshje.

Në bazë të nevojave, biletat që janë në dispozicionin tonë, do t’u akordohen grupimit të tifozëve “Dardanët”, kurse pastaj në bazë të obligimeve kontraktuale që ka, FFK-ja do të ndajë bileta për sponsorët, bashkëpunëtorët, institucionet si dhe në fund familjarët e futbollistëve.

Ne e çmojmë jashtëzakonisht shumë përkrahjën e parezervë që marrim nga publiku në rrugëtimin drejtë ëndrrës për kualifikim dhe u jemi shumë mirënjohës të gjithë qytetarëve të Kosovës dhe mërgimtarëve që janë në gjendje të bëjnë shpenzime të pabesueshme vetëm për të qenë krah futbollistëve në këtë ndeshje, por në situatën në të cilën jemi, e kemi të pamundur të sigurojmë bileta për takimin që zhvillohet në Plzen.

Stadiumi ku zhvillohet ndeshja ka kapacitet të ultë dhe përkundër insistimit tonë, Federata Çeke e Futbollit ka refuzuar të ndaj numër pak më të madh biletash për sektorin e shikuesve mysafirë.