Fillon pagesa në Rrugën e Kombit, do të ketë protesta

Sot nis pagesa për qarkullimin në Rrugën e Kombit. Kompania që ka marrë me koncesion shërbimin, ka vendosur 10 sportele për pagesa, ndërsa dy prej tyre janë vetëm për banorët e qarkut Kukës, të cilët kanë përfituar nga një skemë lehtësuese.

Por, banorët e Kukësit dhe disa zonave të tjera kanë paralajmëruar protestë për të kundërshtuar vendimin e Qeverisë shqiptare për ta vënë në fuqi taksën rrugore për automjetet që kalojnë në autostradën Prishtinë-Tiranë.

Banorët e kësaj zone janë të pakënaqur, pasi duhet të kalojnë rrugën edhe për të shkuar në spitalin më të afërt regjional apo në shkolla dhe duhet të paguajnë për kalim, përcjell albinfo.ch.

Ndryshe, protesta e kaluar ishte mbajtur në marsin e këtij viti dhe kishte eskaluar me dhunë dhe djegie të pikës kontrolluese që është vendosur afër tunelit të Kalimashit. Tarifat bazë janë për motoçikleta 2.5 euro, për vetura 5 euro, autobusë dhe kamionë 11 euro, kamionët e mesëm 16.2 euro dhe kamionët e rëndë 22.5 euro.