Fitore Pacolli: “BE thotë se sivjet s’ka heqje vizash”, e mohon Deliu-Kodra

është shumë e qartë që Kosova nuk ka bërë ndonjë hap konkret sa i përket luftimit të korrupsionit dhe krimit të organizuar”, ka thënë Pacolli

Deputetët e Kuvendit të Kosovës kanë marrë sinjale nga zyrtarë të BE-së se sivjet nuk do të ketë liberalizim vizash. Kështu ka thënë deputetja e Lëvizjes Vetëvendosje, Fitore Pacolli, e cila ka njoftuar se Komisioni për Integrime Evropiane ka zhvilluar një takim me zyrtarë ne Zyrën e Bashkimit Evropian në Prishtinë.

Në takimin e zhvilluar pa prezencën e mediave, Pacolli ka thënë se Kosova ka dështuar të bëjë hapa konkretë sa i përket luftimit të korrupsionit dhe krimit të organizuar, kushtit të fundit për liberalizimin e vizave.

“Nga ajo që pamë është tashmë e sigurt që nuk do të ketë liberalizim të vizave sivjet dhe është shumë e qartë që Kosova nuk ka bërë ndonjë hap konkret sa i përket luftimit të korrupsionit dhe krimit të organizuar”, ka thënë Pacolli.

Deputetja e VV-së ka thënë se përfaqësuesit e Zyrës së BE-së shpresonin se do të merrnin propozim pozitiv nga Komisioni Evropian, mirëpo sipas saj, Kosova nuk ka bërë mjaftueshëm për përmbushjen e kushtit të fundit për vizat.

Por pretendimet e saj i ka kundërshtuar deputetja e PDK-së, Blerta Deliu-Kodra. Kryetarja e Komisionit për Integrime Evropiane ka thënë se nuk është e vërtetë ajo që ka thënë deputetja Pacolli.