Franca nderon Luan Starovën me medaljen “Legjioni i Nderit”

Akademik Starova është bartës edhe i dekoratës së lartë franceze Komandanti i arteve dhe i letërsisë nga viti 2000

Për kontributin e madh që ka dhënë për miqësinë ndërmjet popullit francez dhe shqiptar, presidenti i Republikës së Francës e ka dekoruar akademikun dhe shkrimtarin e njohur shqiptar nga Maqedonia, Luan Starova me dekoratën Legjioni i Nderit. Ai është bartës edhe i dekoratës së lartë franceze Komandanti i arteve dhe i letërsisë nga viti 2000.

Këto deklarata i ndahen akademikut Luan Starova për kontributin e tij të madh në zhvillimin e marrëdhënieve Francë-Maqedoni në periudhën kur Starova ka qenë ambasadori i parë i Republikës së Maqedonisë në Francë, për kuptimin më të mirë të rajonit në vitet kritike të dekadës së fundit të shekullit të kaluar, citon AlsatM.

Starova është anëtar i Akademisë evropiane, anëtar i rregullt në Akademinë e shkencave dhe arteve të Maqedonisë, anëtar i Akademisë Mesdhetare nga Napoli, anëtar nderi i Akademisë së shkencave të Shqipërisë, si dhe anëtar i shoqatës shkencore “Lajbnic” nga Berlini. Dekorata Legjioni i nderit akademikut Starova do t’i dorëzohet në Shkup më 11 prill.