Shqipëria përtej bregdetit

G02: Nëpër Shkodër e Malësi, me biçikletë

Biçikleta, lëvishmëria dhe turizmi janë në thelbin e krijimit të G02 (ec me dy këmbë dhe me dy rrota), një OJF dhe sipërmarrje sociale e krijuar në vitin 2012 nga një grup të rinjsh shkodranë

E mërkurë, 28 Nëntor 2018 - 11:20 Dori Daka

Shkodra njihet ndryshe edhe si “qyteti i biçikletave”. 29% e popullsisë e përdorin si mjet transporti dhe kënaqësie. Për banorët e saj, në fakt, bëhet fjalë për një traditë, jo për një detyrim dhe kjo i bën rrugët shkodrane kaq të veçanta dhe vetë biçikletën një mjet unik turizmi. Me të mund të eksplorosh sheshet dhe anët më pak të njohura të qytetit mijëravjeçar, por edhe rrethinat e tij të afërta e të largëta.

Pikërisht biçikleta, lëvishmëria dhe turizmi janë në thelbin e krijimit të G02 (ec me dy këmbë dhe me dy rrota), një OJQ dhe sipërmarrje sociale e krijuar në vitin 2012 nga një grup të rinjsh shkodranë. Për këtë është këmbëngulur që “biçikleta” të promovohet edhe si një trashëgimi kulturore me shumë vlera. Sot, anëtarët e G02 kanë arritur të realizojnë projekte interesante, mes të cilave edhe projekte në fushën e turizmit.

Shkodra e biçikletave, e krahasueshme me qytetet evropiane

Eltjana Shkreli është vajza, ose “truri” pas ideve dhe risive të G02. E apasionuar pas traditës dhe kulturës së vendlindjes, me një përkujdesje dhe seriozitet, që e shfaq në çdo detaj të punës, ajo flet me shumë pasion për turizmin me biçikleta. Sigurisht ka edhe ajo një biçikletë dhe prej vitesh ka përshkuar çdo rrugë, rrugicë dhe itinerar të Shkodrës dhe gjithë zonës përreth. Ky pasion dhe kjo njohje i vunë kreativitetin në punë dhe sollën organizimin e paketave të para turistike, për grupet e të huajve të etur pikërisht për një aventurë të tillë.

Udhëtimet me biçikletë dhe ecjet e gjata në natyrë kombinohen dhe ndërthuren me ndalesa në hane e biznese të vogla. Por, ka edhe nga ato turne që përgatiten, sipas kërkesave specifike të turistëve. I tillë është ai i një grupi me studentë të ekonomisë nga Zvicra, që kanë prenotuar për verën e këtij viti. Ata përveç shijimit të natyrës, duan të bëjnë vizita edhe në biznese sociale të zonës dhe sipërmarrje që synojnë t’u japin punë dhe shpresë banorëve të fshatrave të thella, ku jeta është e vështirë dhe mundësitë e pakta. Një nga veçantitë e G02 është se të ardhurat e gjeneruara nga turizmi i përdorin për të mbuluar shpenzimet e tyre operacionale si dhe për ndërgjegjësimin e banorëve të zonave rurale për vlerat e natyrës dhe mundësinë që kanë për të përfituar prej saj nga pikëpamja turistike.

Rrugët ku mund të pedalosh brenda dhe në periferi të qytetit e deri në zonat e malësive përreth, janë propozuar nga kjo organizatë që të bëhen pjesë e itinerarit evropian të rrugëve të biçikletave, duke qenë se Shkodra është një kampione e biçikletës edhe e krahasuar me qytete tradicionale evropiane.

Pasioni shpërblehet me çmime të shumta

Përkushtimi disavjeçar i ka shpërblyer me çmime kombëtare dhe ndërkombëtare si: “RisiTuristike2015” – Helvetas Swiss Intercooperation; “Cycling Visionary” – Çmimi i jurisë i konferencës globale, Velo-City, 2013; “Act Now” nga Ambasada Amerikane, Tiranë; “Green Ideas 2014” nga “Partners Albania”.

Dy janë paketat më interesante që propozon G02. Zakonisht organizohen ture 8-ditore në zonat rurale të Shkodrës me fokus eko-turizmin. Një rrugë, e cila në më të shumtën e saj përshkohet me biçikletë. Përgjatë itinerarit mund të shijosh edhe bukurinë e lumenjve, si Drini, Kiri apo Buna. Mund të pedalosh përgjatë liqenit të Shkodrës, të lahesh në bregdetin e Adriatikut në Velipojë, apo të shëtisësh në ujërat e liqenit të Komanit e të shëtisësh me varkë. Për raste të veçanta biçikleta kombinohet edhe me ecje.

Paketa speciale ”Periudha e totalitarizmit në Shqipëri”

Për ata që duan të dinë më shumë për qytetin e Shkodrës, historinë dhe kulturën e tij, është krijuar paketa prej 2 orësh e gjysmë me titull ”Periudha e totalitarizmit në Shqipëri”. Kjo paketë u konceptua pas interesit të madh të turistëve të huaj për të pasur informacion për periudhën e errët 50-vjeçare të Shqipërisë nën diktaturë.