Gati fletarresti për Zharkun

Gjykata Themelore e Ferizajt, Dega në Kaçanik ia ka dorëzuar Ministrisë së Drejtësisë kërkesën për lëshimin e fletarrestimit ndërkombëtar për Xhabir Zharkun

Ish-kryetari i Kaçanikut, Xhabir Zharku i cili është parë duke bërë “qejf” në disa restorante të Malmos në Suedi, shuamë shpejt do të përballet me një fletarrest ndërkombëtar, të cilin janë duke e “hartuar” autoritetet kosovare. I arratisur disa javë më parë, Zharku nuk do të lihet rehat as në Skandinavi.

Sipas burimeve të “Kohës”, Gjykata Themelore e Ferizajt, Dega në Kaçanik ia ka dorëzuar Ministrisë së Drejtësisë kërkesën për lëshimin e fletarrestimit ndërkombëtar për Zharkun, i dënuar me tri vjet burgim, për veprën penale të detyrimit dhe për armëmbajtje pa leje.

Kërkesa i ishte bërë Ministrisë së Drejtësisë, pasi gjykata ishte informuar nga Policia e Kosovës se i arratisuri nuk ndodhet në Kosovë. Ndërsa mediet në Prishtinë kanë raportuar se Zharku është parë me vëllanë e tij në Malmo të Suedisë në një restorant të këtij qyteti.

“Është e vërtetë se kërkesa për urdhërarrestit ndërkombëtar i ka shkuar Ministrisë së Drejtësisë”, i kanë thënë “Kohës” burime brenda Gjykatës Themelore të Ferizajt, Dega në Kaçanik. Policia ndërkaq e ka konfirmuar se paraprakisht e ka njoftuar gjykatën se i kërkuari për t’u dërguar në vuajtje të dënimit nuk ndodhet në Kosovë.

Ndryshe, ish prefekti i Kaçanikut i cili është dënuar me tri vjet heqje lirie, është arratisur në momentin e fundit, kur ai është dashur të shkoj në vuajtje të dënimit. Ai pas një jave ishte lajmëruar në internet se është i pafajshëm dh se ndaj tij është hartuar një proces i montuar gjyqësor.

Zharku, dikur komandant rajonal i UÇK-së, ka qenë për 5 vjet kryetar i Kaçanikut. Ai ka nënshtetësi suedeze, ndërsa ishte kthyer vullnetar në luftë nga diaspora. Ish-prefekti Zharku ishte gjetur fajtor nën akuzën për zhvatje, kërcënim dhe armëmbajtje pa leje.