Gjeneva zbut masat: Të enjten rihapen baret dhe restorantet

Këshilli i Shtetit (qeveria e kantonit) ka njoftuar të hënën lehtësimin e masave, "edhe pse situata nuk është aq ideale sa shpresohej"

Në kantonin e Gjenevës, restorantet dhe baret do të mund të rihapen duke filluar nga e enjtja e ardhshme. Numri i njerëzve për tryezë do të jetë i kufizuar në katër ndërsa koha e mbylljes së lokaleve në fjalë do të jetë ora 23.00, raporton sda.ch.

Këshilli i Shtetit (qeveria e kantonit) ka njoftuar të hënën lehtësimin e masave, edhe pse situata nuk është aq ideale sa shpresohej, është shprehur kryetarja e Këshillit, Anne Emery-Torracinta, transmeton albinfo.ch. “Të gjithë kanë nevojë për një pushim në fund të vitit”, është shprehur ajo.

Kantonet e tjera që po ashtu kishin mbyllur restorantet e tyre do t`i rihapin ato të enjten – me përjashtim të kantonit të Valisit, ku ato do të rihapen më 14 dhjetor.

Mbajtja e distancës prej 1.5 metrash midis grupeve dhe mbajtja e maskave është edhe më tutje e detyrueshme, përveç kur klientët janë ulur.

Natën e 31 janarit, restorantet do të lejohen të mbahen të hapura deri në orën 1 të mëngjesit.

Këshilli Shtetëror i Gjenevës ka vendosur të lehtësojë gjithashtu masat kufizuese të takimeve private. Deri në dhjetë persona, përfshirë këtu fëmijët, mund të mblidhen midis 23 dhjetorit dhe 3 janarit, përcjell albinfo.ch. Jashtë kësaj periudhe, zbatohen rregullat për një maksimum prej pesë personash.

---