Gjermani: Migrimi i parregullt bie ndjeshëm

Keystone EPA/KERSTIN JOENSSON

Hyrjet ilegale në Gjermani kanë shënuar një rënie të thellë në dy vitet e fundit, duke zbritur nga mbi 127 mijë në vitin 2023 në vetëm 22,170 deri tani në vitin 2025, sipas të dhënave të publikuara nga policia federale dhe raportuara nga gazeta Die Welt, transmeton albinfo.ch.

Rënia prej më shumë se 100,000 hyrjesh vjen në një kohë kur ministri i ri i Brendshëm, Alexander Dobrindt (CSU), ka filluar zbatimin e masave të ashpra për kontrollin e kufijve, duke urdhëruar kthimin mbrapsht të shumicës së azilkërkuesve  përveç grave shtatzëna, fëmijëve dhe personave në gjendje të rënduar  në kufirin me Austrinë.

Dobrindt, i cili mori detyrën më 6 maj, vizitoi kufirin në Kiefersfelden këtë javë së bashku me kryeministrin bavarez Markus Söder, ku raportuan se 729 tentativa për kalim të paligjshëm u ndaluan në vetëm një javë. “Kontrollet e reja po funksionojnë”, theksoi ministri.

Duke prezantuar planet e tij në Bundestag, Dobrindt tha se “aftësitë integruese të një vendi kanë kufijtë e tyre” dhe se qytetarët presin një ndryshim real në politikën e migracionit. Ai premtoi se Gjermania do të mbetet një vend tolerant dhe i hapur për migrim të ligjshëm në tregun e punës, por do të veprojë me vendosmëri kundër imigracionit të paligjshëm.

Masat kanë gjetur mbështetje të gjerë në radhët e votuesve të konservatorëve. Një sondazh i YouGov për gazetën Süddeutsche Zeitung tregon se 68% e votuesve të CDU-së i përkrahin masat. Megjithatë, 63% e votuesve të ekstremit të djathtë të AfD-së nuk janë të bindur se këto masa do të kenë efekt të madh, duke sugjeruar se Dobrindt mund të mos arrijë të rikthejë mbështetësit e humbur drejt qendrës konservatore, transmeton albinfo.ch.

Partia AfD, aktualisht nën vëzhgim për ekstremizëm nga inteligjenca gjermane, i cilësoi masat si të pamjaftueshme. Deputeti i saj, Gottfried Curio, kërkoi deportim të menjëhershëm të të gjithë migrantëve ilegalë, duke kritikuar përjashtimin e grupeve vulnerabël nga kthimet në kufi.

Nga ana tjetër e spektrit politik, Partia e Majtë (Die Linke) dhe Të Gjelbrit kanë ngritur shqetësime për ligjshmërinë e masave. Deputetja Clara Bünger paralajmëroi për “spirale privimi nga të drejtat”, ndërsa eurodeputeti i Gjelbër, Erik Marquardt, tha se oficerët e policisë mund të përballen me ndjekje penale për kthimin e azilkërkuesve pa proces të rregullt ligjor.

Ndërkohë, sindikata e policisë DPolG ka dalë në mbështetje të qeverisë. Nënkryetari Manuel Ostermann deklaroi se kontrollet po zvogëlojnë presionin mbi Gjermaninë dhe se po ndihmojnë kthimin e procedurave të azilit në vendet kufitare të BE-së, siç e kërkon ligji ndërkombëtar, transmeton albinfo.ch.