Gjermania do të refuzojë migrantët pa dokumente në kufi

Ilustrim, Pixabay

Ministri i Brendshëm i Gjermanisë, Alexander Dobrindt, lëshoi të mërkurën një urdhër për të refuzuar migrantët pa dokumente, përfshirë azilkërkuesit, në kufijtë e vendit. Ky vendim u mor në ditën e parë të punës së qeverisë së re të koalicionit, e udhëhequr nga kancelari Friedrich Merz.

Dobrindt njoftoi se ka anuluar një urdhër të vitit 2015 që lejonte hyrjen e shtetasve të vendeve të treta pa dokumente, me qëllim që të reduktohet migrimi i paligjshëm, duke deklaruar se numri i migrantëve vazhdon të jetë shumë i lartë, raporton reuters pêrcjell albinfo.ch.

“Ky është një çështje qartësie, konsistence dhe kontrolli,” tha Dobrindt për gazetarët.

Gazeta gjermane Bild ishte e para që raportoi mbi këtë plan të mërkurën.

Refuzimi i azilkërkuesve në kufi është një çështje e debatueshme ligjërisht. Marrëveshja e koalicionit mes konservatorëve të Merz-it dhe Socialdemokratëve parashikon që një hap i tillë të bëhet në koordinim me vendet fqinje.

Dobrindt, anëtar i bllokut konservator të Merz-it, planifikon të dërgojë deri në 3,000 oficerë shtesë në kufi për të frenuar migracionin e parregullt, duke e çuar numrin e përgjithshëm të policëve kufitarë në rreth 14,000, sipas raportit të Bild.

Urdhri i vitit 2015 u dha gjatë qeverisjes së ish-kancelares Angela Merkel, mandati i së cilës u karakterizua nga pranimi i qindra mijëra azilkërkuesve, shumë prej të cilëve iknin nga lufta në Siri.

Përpara zgjedhjeve federale në shkurt, Merz premtoi masa të ashpra kundër migracionit, pas disa incidenteve të dhunshme ku ishin përfshirë migrantë dhe rritjes së mbështetjes për ekstremistët e djathtë.

Qeveria e tij tashmë ka rënë dakord për të refuzuar azilkërkues në kufi, për të mundësuar deportimet në Siri dhe për të pezulluar bashkimet familjare.