Gjermania, partneri i dytë tregtar i Shqipërisë

Kontributi 25-vjeçar i Gjermanisë për Shqipërinë ka arritur në 1 miliard euro duke u kthyer në partnerin më të madh bilateral

Gjermania llogaritet si partneri i dytë tregtar i Shqipërisë. Shkëmbimet tregtare me Gjermaninë në 7 muajt e parë të këtij viti llogariten 7.1 % të totalit, duke e renditur këtë vend si partnerin e dytë tregtar, pas Italisë, e duke lënë pas Greqinë dhe Kinën.

Sipas INSTAT edhe pse Gjermania llogaritet partneri i dytë tregtar, importet prej saj ranë me 5.7 % dhe llogariten 10.9 % të totalit të mallrave të importuara. Ndërsa eksportet zunë 5.1 % të totalit të mallrave të eksportuar, bën të ditura mediat shqiptare.

Referuar raportit mbi tregtinë e jashtme të publikuar nga INSTAT-i, importet për periudhën janar-korrik llogariten 29.473 milionë lekë dhe eksportet 6.455 milionë lekë, përcjell albinfo.ch.

Bashkëpunimi ekonomik me Gjermaninë në vitet e ardhshme parashikon projekte të rëndësishme në fushën e infrastrukturës. Kontributi 25-vjeçar i Gjermanisë për Shqipërinë ka arritur në 1 miliard euro duke u kthyer në partnerin më të madh bilateral.

Rëndësi e veçantë pritet t’i jepet në këtë bashkëpunim edhe nxitjes së investimeve në sektorët strategjikë, si zhvillimi ekonomik, turizmi, bujqësia, transporti dhe infrastruktura, e kombinuar me nxitjen e punësimit dhe trajnimit profesional.