Gjilani, Vitia e Kumanova me tregje të përbashkëta ndërkufitare

Dy kryetarët e komunave të Karadakut të Kosovës, Lufti Haziri i Gjilanit, Sokol Haliti i Vitisë dhe kryetari i Kumanovës, Maksim Dimitrievski janë pajtuar për organizimin e  tregjeve të vogla dhe lëvizëse në zonat ndërkufitare

Kryetari i Komunës së Gjilanit, Lutfi Haziri dhe kryetari i Komunës së Vitisë, Sokol Haliti, kanë qëndruar sot në Komunën e Kumanovës për të finalizuar marrëveshjen e bashkëpunimit për mbështetjen e sektorit të bujqësisë dhe ngritjes së kapaciteteve prodhuese ndërkufitare. Dy kryetarët e komunave të Karadakut të Kosovës dhe kryetari i Kumanovës, Maksim Dimitrievski janë pajtuar për organizimin e  tregjeve të vogla dhe lëvizëse për shitjen e sigurt të produkteve të freskëta nga zonat ndërkufitare.

Kryetari Lutfi Haziri ka thënë se projekti ka për qëllim nxitjen e shitjes, por edhe rritje të vlerës së fitimit nga prodhimet vendore që tregut do ti ofrohen gjithnjë të freskëta.

“Kjo është një mbështetje për punën e madhe që bëjnë fermerët gjatë gjithë kohës, në punimin e tokës nga të dyja anët e kufirit, nga Komuna e Gjilanit dhe e  Kumanovës”, ka potencuar Haziri

“Modernizimi i tregjeve të shitjes me pakicë dhe promovimi më i madh i produkteve të punuara nga bujku i Gjilanit dhe Kumanovës, ne i kemi tashmë në marrëveshjen e bashkëpunimit, me financimin e Komisionit Evropian në kuadër të programit IPA-s, në vlerë prej mbi 320 mijë euro dhe me procedura të implementimit që do të filloj në muajin janar”, tha ai.

Sipas Hazirit, është e planifikuar të organizohen trajnime për fermerë në fusha të ndryshme e konkretisht për rritjen e shitjes, organizimin e tregjeve të lëvizshme, kurse në të ardhmen sipas tij, do të punohet edhe për organizimin e përbashkët të javës së tregut ndërkufitar, ku do të marrin pjesë fermerë të dy komunave.

Edhe kryetari Haliti, por edhe kryetari i Komunës së Kumanovës, Maksim Dimitrievski, e kanë mirëpritur këtë investim që do të bëhet në këtë zonë ndërkufitare përmes programit të bashkëpunimit ndërkufitar.