Gjithnjë e më shumë njerëz po përdorin ChatGPT për këshilla mbi shëndetin mendor

(KEYSTONE/Christian Beutler)

Një numër në rritje i individëve po i drejtohen inteligjencës artificiale për mbështetje dhe këshilla lidhur me shëndetin mendor, në një kohë kur problemet si ankthi, stresi dhe depresioni po shtohen globalisht.

Sipas një raporti vjetor për shëndetin mendor në botë, rreth 68% e njerëzve përjetojnë të paktën nivele të lehta ankthi, stresi ose depresioni. Tek grupmosha e të rinjve 18–24 vjeç, kjo përqindje arrin deri në 85%, duke treguar një ndikim edhe më të madh.

Studimi, i bazuar në intervista me rreth 19 mijë të rritur nga 18 shtete, tregon se 6 në 10 persona përdorin chatbot-e si ChatGPT për ndihmë psikologjike. Megjithatë, 45% e tyre nuk janë të kënaqur me këshillat që marrin, ndërsa 38% u besojnë më shumë këtyre platformave sesa profesionistëve të shëndetit mendor.

Po ashtu, 46% e të anketuarve raportojnë probleme psikologjike, ku më e shpeshta është ndjenja e trishtimit dhe rënia e humorit.

Të rinjtë rezultojnë më të prekurit, me 43% që shfaqin nivele të larta ankthi, depresioni ose stresi — pothuajse dy herë më shumë se mesatarja globale.

Ekspertët paralajmërojnë se përdorimi i tepruar i ekraneve dhe varësia nga teknologjia mund të rrisë ndjenjën e izolimit dhe vetmisë, sidomos tek të rinjtë.

Studimi tregon gjithashtu se njerëzit kalojnë mesatarisht 5.1 orë në ditë para ekraneve, ndërsa 66% thonë se kjo ndikon negativisht në jetën e tyre të përditshme, duke përkeqësuar gjumin, përqendrimin dhe aktivitetin fizik.