Gruaja 81 vjeçe vë në kurth kosovarin, mashtrues “telefonik”

Korrieri që kishte marrë pakon e rreme ishte një kosovar 54-vjeçar dhe bashkëpunëtori i tij, një zviceran 28-vjeçar

Një grua e moshuar (81 vjeçe) në Meilen ZH ka kuptuar qëllimin e mashtruesve telefonikë dhe ka kthyer “lojën” mbrapsht. Policia më pas ka arrestuar dy persona të dyshimtë.

Një histori emocionuese si nga filmat ka ndodhur para një jave në Meilen (ZH) sipas asaj që policia kantonale e Cyrihut ka publikuar në një njoftim për media të enjten, transmeton albinfo.ch

Para një jave 81-vjeçarja kishte marrë disa telefonata nga burra të panjohur në telefonin e saj fiks: njëri paraqitej si polici, tjetri si prokuror publike dhe i treti si punonjës bankare. Ata i tregonin gruas se po zhvilloheshin hetime për vjedhje dhe përpiqeshin të fitonin besimin e saj.

Më pas, ata i kërkuan 81 vjeçares që të tërhiqte nga banka dhjetëra mijëra franga, shkruan bluewin.ch. Ajo gjithashtu, sipas “këshillës” së tyre, duhet të shkëmbente një pjesë të shumës edhe me shufra ari. Më pas, ajo duhet ta vendosë këtë pasuri para derës së banesës së saj në një kohë të dakorduar.

Por gruaja shpejt dyshoi se mund të ishte fjala për një mashtrim. Kështu, ajo raportoi për të gjitha, në policinë e vërtetë.

Ndërkohë, gruaja nga Meileni vazhdonte të ruante lidhjet me mashtruesit dhe shfaqej para tyre sikur nuk e kishte idenë se çfarë po bëhej, përcjell albinfo.ch. Paraditen e së martës, të moshuarën e kanë telefonuar sërish mashtruesit e dyshuar telefonikë. Ata i kanë thënë se do të vinin të merrnin arin dhe paratë.

Në konsultim me policinë e vërtetë, gruaja më në fund ka vendosur një pako me plaçkën e pretenduar para derës së banesës së saj. Pas orës 17:00 u shfaq një burrë dhe mori pakon e vendosur aty. Hetuesit gjatë gjithë kohës po vëzhgonin se çfarë po ndodhte dhe arritën ta ndiqnin personin në fjalë me makinë deri në Olten SO. Atje ai më në fund ia dorëzoi pakon një bashkëpunëtori rreth orës 19 e tridhjetë.

Si rrjedhim, policia ka marrë masat dhe ka arrestuar dy personat. Korrieri që kishte marrë pakon e rreme ishte një kosovar 54-vjeçar dhe bashkëpunëtori i tij, një zviceran 28-vjeçar, transmeton albinfo.ch. Të dy të dyshuarit janë dërguar në Prokurorinë Publike pas marrjes në pyetje nga policia.

81-vjeçarja nuk ka pësuar asnjë dëm financiar.

---