Hamza: Kosova zhvilloi proces dinjitoz, të respektohet plotësisht vullneti i qytetarëve

Kryetari i Partisë Demokratike të Kosovës (PDK), Bedri Hamza, ka vlerësuar se Kosova ka zhvilluar një proces zgjedhor të qetë, të rregullt dhe dinjitoz, duke theksuar rëndësinë e ruajtjes dhe respektimit të plotë të vullnetit të qytetarëve.

Në reagimin e tij pas mbylljes së votimeve të së dielës, Hamza falënderoi qytetarët për pjesëmarrjen dhe sjelljen e tyre, duke thënë se ata dëshmuan kulturë demokratike dhe përgjegjësi qytetare gjatë gjithë procesit zgjedhor.

Ai gjithashtu vlerësoi institucionet përgjegjëse, komisionerët, vëzhguesit, mediat dhe forcat e rendit për angazhimin e tyre në organizimin dhe mbarëvajtjen e zgjedhjeve.

Sipas Hamzës, prioritet në këtë fazë mbetet numërimi i saktë dhe transparent i çdo vote, duke theksuar se demokracia nuk përfundon me votim, por me respektimin e tij.

Në fund, ai u bëri thirrje të gjitha palëve që të kontribuojnë në ruajtjen e stabilitetit institucional dhe në respektimin e vullnetit qytetar.