Haradinaj: Pa njohje nga Serbia, nuk heqim taksën

Kryeministri Ramush Haradinaj ka thënë se masat që janë vendosur  në produktet që vijnë nga Serbia duhet të jenë të përhershme, deri në njohje. 

“Derisa Serbia nuk e njeh Kosovën shtet të pavarur, nuk duhet të largohet kjo masë. Do të na jepet ndonjë çmim si kundërvlerë për këto masa, por Kosova nuk është mirë t’i largojë derisa nuk njihet pavarësia. Jo se e kemi zbuluar Amerikën, por ju siguroj që pa një qasje të tillë, është e pamundur të arrihet një marrëveshje obliguese e njohjes së ndërsjellë”, ka thënë kryeministri Haradinaj në seancën e sotme të Kuvendit. 

Kryeministri ka kërkuar unitet nga partitë politike për këtë temë, njësoj sikurse me ushtrinë. 

Ndërsa, ai ka kërkuar nga sipërmarrësit të mos e keqpërdorin këtë vendim që e ka marrë Qeveria. 

“Mos merrni këshillë nga fqinjët që të rriten çmimet me shpresën se Qeveria lëshon rrugë. Nuk është rrugë ajo. Të rrimë bashkë se do t’ia dalim bashkë”, ka thënë Haradinaj.