Haradinaj sërish sulmon prokurorin Blakaj

"Individët si Blakaj, duke manifestuar protagonizëm të rrejshëm me sulmet e tyre ndaj drejtësisë kosovare përmes medieve, tentojnë të rrezikojnë përpjekjet për forcimin e sundimit të rendit e ligjit në Kosovë"

Kryeministri Ramush Haradinaj ka publikuar në profilin e tij në Facebook letërkëmbimin që ka pasur me prokurorin që hetonte veteranët Elez Blakaj. Haradinaj thotë se u është drejtuar ambasadorëve të akredituar dhe zyrtarëve të Zyreve Ndërlidhëse në Kosovë, ku i ka shpjeguar me një letër përkrahjen e tij të pakusht ndaj të gjitha kërkesave të parashtruara nga prokurori i dorëhequr, Elez Blakaj, për tërë hetimin në Zyrën për Çështje të kategorive të dala nga lufta e UÇK-së lidhur me çështjen e listës së veteranëve.

“Ish-prokurori Blakaj ka ardhur në zyrën time dhe ka kërkuar dy javë kohë për të zhvilluar hetimet në arkiv. Me vullnet të plotë për të ndihmuar procesin, kam qenë në dispozicion për çfarëdo kohe, që ai e përcakton. Jemi dakorduar që pas 30 ditëve të ofrojë një raport me rrjedhën e hetimeve, specifikisht a ka pasur mundësi që të hetojë pa ndërhyrje, paanshmërish dhe me integritet të plotë.

Qeveria e Republikës së Kosovës dhe institucionet qendrore janë të vendosura që të forcojnë dhe sigurojnë rendin dhe ligjin në gjithë Kosovën. Politikat që kemi hartuar dhe zbatuar në rend e ligj, ndër të tjera, përfshijnë fuqizimin e rolit të prokurorëve dhe gjyqtarëve”, ka shkruar Haradinaj.  Por ai ka thënë se individët si Blakaj, duke manifestuar protagonizëm të rrejshëm me sulmet e tij ndaj drejtësisë kosovare përmes medieve, tentojnë të rrezikojnë përpjekjet për forcimin e sundimit të rendit e ligjit në Kosovë. “Ky rast nuk do të pengojë vendosmërinë tonë të fortë për një sistem të plotë funksional të drejtësisë në Kosovë”, ka përfunduar Haradinaj.