Inaugurohet kompleksi i 158 dëshmorëve të Drenicës

Gjatë ditës së sotme është inauguruar kompleksi I 158 dëshmorëve në Marinë të Skenderajt.

Ky inaugurim u bë me anë të një ceremonie shtetërore, ku në kompleks janë rivarrosur 158 dëshmorë të zonës së Drenicës.

Presidenti Thaçi i cili mori pjesë në inaugurim, tha se dëshmorët të cilët do të rivarrosen në këtë kompleks do të nderohen me urdhrin “Hero i Kosovës”.

“UÇK-ja nga strategët dhe teoricienët e luftës botërore konsiderohet si guerilja, lëvizja çlirimtare më e suksesshme e shekullit 20-të në botë. Ajo doli nga populli. Ishte ushtri e vullnetit dhe e gatishmëri për flijim për liri dhe çlirim”, tha presidenti.

Kryeministri Ramush Haradinaj tha se askush nuk guxon t’i lëviz kufinjtë që janë të vendosur me gjak.

“Duhet ta ruajmë Kosovën në territorin dhe kufijtë e vet, të jenë të paprekshëm prej askujt. Këta kufij na i kanë lënë amanet këta që po i rehatojmë. Nuk guxojmë të lëvizim atë që është mbrojtur me gjak. Ne ju kemi borxh të gjithë dëshmorëve dhe martirëve. Sot po përmbyllet një borxh i yni”, tha Haradinaj.

I pari i kuvendit,  Kadri Veseli e ka quajtur kompleksin e Marinës si Meka e Kosovës.

“Jemi duke e bërë punën tonë, që nga presidenti Hashim Thaçi, kryeministri Ramush Haradinaj dhe ne të gjithë të tjerët. Mos t’i hapim fjalë njëri-tjetrit, sepse kjo tokë është e shenjtë.  Është çështje e ditëve, e javëve deri në transformimin e Ushtrisë Çlirimtare e Kosovës, FSK-ja është UÇK. Urime ky monument i lavdisë i Ushtrisë Çlirimtare të Kosovës”, tha ai.