Investitorët interesohen për Brezovicën

Sot është bërë pranimi dhe hapja e kërkesave të para për Shprehje të Interesit nga pesë kompani të interesuara për Brezovicën

Qendra Turistike në Brezovicë duket se ka joshur investitorët e brendshëm për edhe ndërkombëtarë, për të investuar në këtë kompleks turistik. Sot është bërë pranimi dhe hapja e kërkesave të para për Shprehje të Interesit nga pesë kompani të interesuara për këtë projekt.

Sa i përket profilit të kompanive të cilat kanë dorëzuar kërkesat për Shprehje të Interesit, ato do të publikohen më vonë, në momentin që komisioni vlerësues profesional do ta bëjë përzgjedhjen e kompanive të parakualifikuara.

“Mbi këtë bazë, kompanitë e parakualifikuara do të kenë mundësi që, në fazën e dytë për një periudhë të caktuar kohore, të përgatisin propozimin e tyre për dizajnimin, ndërtimin, operimin dhe financimin e Qendrës Turistike të Brezovicës në përputhje me kriteret dhe afatet e caktuara nga Komiteti Drejtues Ndërministror’, thuhet në njoftim, transmeton TG.

Qeveria e Kosovës pati bërë publike shpalljen për Shprehje të Interesit në gazetat vendore dhe ndërkombëtare si dhe informacionet e tjera mbi konferencat e investitorëve në të cilat është prezantuar Projekti i Brezovicës në katër shtete të ndryshme.

Përmes këtyre aktiviteteve është bërë vlerësimi i tërësishëm i tregut për projektin në fjalë, për të vazhduar më pas me mënyrën më të mirë të zhvillimin të kësaj Qendre turistike malore.

Projekti Zhvillimor i Qendrës Turistike të Brezovicës i shpallur nga Qeveria e Republikës së Kosovës si projekt i rëndësisë kombëtare vlerësohet si një nga destinacionet më atraktive në rajon për zhvillimin e turizmit gjatë tërë vitit, me theks të veçantë në fushën e skijimit.

Komiteti Drejtues Ndërministror i ngarkuar për Projektin Zhvillimor të Qendrës Turistike të Brezovicës përbëhet nga kryesuesja e KDNM-së, Ministrja e Tregtisë dhe Industrisë, Kryetar i Komunës së Shtërpcës, Ministri i Financave, Ministri i Bujqësisë, Pylltarisë dhe Zhvillimit Rural, zëvendësministër i Integrimeve Evropiane, Ministri i Mjedisit dhe Planifikimit Hapësinor dhe Ministri i Pushtetit Lokal.

Ndryshe, Brezovica është njëra nga qendrat më të bukura rajonale të Turizmit që shtrihet në malet e Sharrit. Hapësira e qendrës së skijimit është rreth 2500 hektarë, në lartësinë mbidetare 1718-2522 metra. Përbrenda kësaj hapësire janë shtigjet e skijimit me gjatësi mesatare rreth 4 km dhe me një lakueshmëri mesatare prej 38 %.

Në lartësinë mbidetare prej 1718 m gjendet teleferiku i ndërtuar në kohën e ish-Jugosllavisë, ndërsa dy tri vitet e fundit i dalë nga sistemi. Stacioni i daljes nga ky teleferik është në lartësinë 2212 metra mbi nivelin e detit.

Qendra e skijimit “Brezovica” është e hapur për dashamirët e skijimit gjatë gjitha stinëve të vitit, ku në verë, sipërfaqja e mbuluar me borë zvogëlohet por prapë lë mundësin e shfrytëzimit. Kjo qendër po ashtu posedon disa hotele cilësore të kategorive më të larta.