Lajme

Ja përse gjermanët preferojnë të emigrojnë në Zvicër

Në fillim të vitit 2021, rreth 309,000 shtetas të Gjermanisë tashmë jetonin në Zvicër. 0.7% më shumë se në vitin 2020

Gjermanët preferojnë të emigrojnë në Zvicër. Këtë e tregojnë shifrat e Entit Federal të Statistikave, si të Zvicrës, ashtu edhe atij të Gjermanisë .

Në fillim të vitit 2021, rreth 309,000 shtetas të Gjermanisë tashmë jetonin në Zvicër, transmeton albinfo.ch. Krahasuar me vitin 2020, kjo tregon për një rritje prej 0,7 për qind.

Por, numri i gjermanëve në Zvicër është në rritje të vazhdueshme prej vitesh.

Për nga numri i gjermanëve të emigruar, si vend i preferuar destinacioni, Austria zë vendin e dytë, shkruan srf.ch. Rreth 209,000 gjermanë kanë jetuar atje në vitin 2021. Por, rritja në Austri ka qenë dukshëm më e madhe se sa në Zvicër.

Krahasuar me vitin 2020, në Austri kishte katër për qind më shumë gjermanë.

Konsiderohet se fakti që dy vendet e para i zënë shtetet gjermanofonme (Zvicra dhe Austria) mund të shpjegohet me gjuhën e përbashkët dhe afërsinë fizike mes tre kombeve dhe shteteve.

Spanja del e treta, me 140,000 shtetas gjermanë të shpërngulur atje.

Zvicra është gjithashtu më e avancuar edhe për sa i përket natyralizimit të të huajve, transmeton albinfo.ch. Kështu, Zvicra ishte gjithashtu vendi evropian shtetësinë e së cilës gjermanët e kanë marrë më së shpeshti. Autoritetet zvicerane kanë regjistruar 6,900 natyralizime të gjermanëve në vitin 2020. Kjo do të thotë se 4.3 për qind më shumë gjermanë kanë marrë nënshtetësinë zvicerane sesa në vitin 2019.

Suedia ishte shumë prapa në vendin e dytë me 1400 natyralizime të shtetasve gjermanë.


LAJME INTERESANTE NGA INTERNETI