Sport

Jorge Mendes ia ofron Romës transferimin e Cristiano Ronaldos

Cristiano Ronaldo ka vendosur të largohet nga Manchester United vetëm pas një vit qëndrimi në Old Traford.

Sulmuesi portugez nuk bën pjesë në planet e trajnerit Erik Ten Hag dhe nuk dëshiron të mbetet edhe për një edicion pjesë e Djajve të Kuq.

37-vjeçari ka pasur një sezon në aspektin personal shumë të mirë ku në 38 ndeshje zyrtare shënoi 24 gola e bëri tre asistime, por pa arritur të fitojë trofe ose ta kualifikoj skuadrën në Ligën e Kampionëve.

Agjenti i Ronaldos, Jorge Mendes ka pasur një bisedë me Jose Mourinhon dhe drejtorin sportiv të Romës, Thiago Pinto.

Mendes ia ka ofruar Romës transferimin e CR7 i cili mund ta ndërpresë me marrëveshje kontratën me Manchester United. Te Roma e duan Ronaldon, por problemi mbetet paga e tij e lartë prej 28 milionë eurove në sezon.

Klubi italian po shikon mundësitë të gjej sponsorë të rinj të cilët do t’i ndihmojnë për pagën e Ronaldos, derisa drejtat e imazhit do t’i takojnë vet portugezit.

Gjithsesi në garë për Ronaldon mbetet edhe gjiganti anglez Chelsea, me pronarin e ri që tanimë ka pasur një takim kokë më kokë me Jorge Mendes.

Ronaldo i është ofruar edhe Bayern Munichut dhe Paris Saint Germainit, por të dyja këto klube kanë refuzuar të nënshkruajnë me të.