Kontrollimi “kot” i veturave

Shumica e makinave që regjistrohen në Kosovës kalohen pa ekzaminim të duhur gjatë kontrollimit teknik

Bazuar në regjistrimin e fundit të popullsisë, Kosova ka mbi 1.8 milionë banorë rezident, ndërsa ka të regjistruara mbi 287 mijë vetura, që tregon se çdo i 6 person në Kosovë ka një veturë. Por, shumica nga këto makina janë relativisht të tjetra, të cilat ekzaminohen “shkel e shko” gjatë kontrollimit teknik.

Ky ekzaminim ka qenë njëri ndër shkaktarët, që për 13 vjetet e fundit në komunikacion ta gjejnë vdekjen rreth 2 mijë kosovarë, ndërsa më shumë se 80 mijë të lëndohen. Një pjesë e madhe e këtyre aksidenteve, siç ka raportuar “Zëri” po ndodhin si pasojë e gjendjes së keqe teknike të automjeteve.

G.B. ka thënë se para disa ditësh e ka dërguar veturën e tij në një qendër të kontrollit teknik dhe se ekzaminimi i është bërë në marrëveshje me pronarin.

“Para pak ditësh e kam paguar regjistrimin e veturës, kontrolli teknik më ka kushtuar 20 euro, por shuma në faturë më është faturuar 30 euro. Këtë e kemi bërë në marrëveshje me teknikun ngase i kam thënë se vetura është në rregull”, ka thënë ky qytetar.

Saranda Jusufi, udhëheqëse e Divizionit për Komunikim Publik në Ministrinë e Infrastrukturës, thotë se në Kosovë janë 108 qendra të kontrollit teknik të licencuara nga Ministria. Për shkaka të mosplotësimit të kritereve, ajo tha se vitin e kaluar disa qendra kontrolluese janë mbyllur.

Ndryshe, që janari deri në gusht të këtij viti, në Kosovë janë zhdoganuar më shumë se 11 mijë vetura të vjetra, ndërsa janë importuar vetëm 779 vetura të reja. Kjo shifër tregon se pas vendimit të Qeverisë së Kosovës për heqjen e kufizimeve për importin e veturave,  Kosova është mbushur me vetura të vjetra.