Kosova drejt humbjes së dhjetëra milionave euro nga fondet e BE-së

Ngërçi politik mund t’i kushtojë Kosovës miliona euro nga fondet evropiane

Kosova rrezikon të humbë dhjetëra miliona euro nga fondet e European Union, si pasojë e krizës politike dhe mungesës së institucioneve funksionale. Kështu ka paralajmëruar korrespodenti në Bruksel i Koha, Augustin Palokaj, përcjell albinfo.ch.

Sipas tij, edhe në kushte normale do të ishte e vështirë që Kosova t’i shfrytëzonte mjetet brenda afateve të përcaktuara, ndërsa situata aktuale politike dhe shkuarja drejt zgjedhjeve të parakohshme e bëjnë këtë pothuajse të pamundur.

Palokaj thekson se vendi tashmë ka humbur kohë të çmuar për shkak të krizës politike dhe masave ndëshkuese të BE-së që zgjatën gati tre vjet. Edhe pse fondet janë liruar, mungesa e institucioneve të qëndrueshme po e vështirëson përdorimin e tyre.

Sipas përllogaritjeve, vetëm në muajin qershor Kosova rrezikon të humbë rreth 68.8 milionë euro, pasi nuk janë përmbushur reformat e kërkuara në kuadër të Planit të Rritjes për Ballkanin Perëndimor, nga i cili Kosova pritej të përfitonte rreth 880 milionë euro.

Ndërkohë, vendi pritet të mbajë zgjedhje të parakohshme parlamentare më 7 qershor, një proces që pritet të kushtojë mbi 10 milionë euro, ndërsa humbjet nga fondet e BE-së mund të jenë shumëfish më të mëdha./Albinfo.ch

---