Kosovaren e aksidentuar e nxjerrin përmes derës së bagazhit

Makina e saj është përmbysur nga ana e timonit duke ia bërë të pamundur ngasëses, një kosovareje 19 vjeçe, që të dalë prej aty

Të premten në Knittelfeld të landit austriak Steiermark zjarrfikësit janë detyruar ta nxjerrin nga makina një drejtuese 19-vjeçare të makinës së aksidentuar, shkruan krone.at.

Vetura e saj, pas humbjes së kontrollit, nga shkaqe të panjohura është përplasur dhe ka dalë jashtë rrugës, transmeton albinfo.ch. Me atë rast makina është përmbysur nga ana e timonit, duke ia bërë të pamundur ngasëses, një kosovareje 19 vjeçe, që të dalë prej aty.

Pak minuta pas marrjes së alarmit, në vendin e ngjarjes kanë ardhur zjarrfikësit, Kryqi i Kuq, mjeku i emergjencës dhe policia nga lokalitetet Knittenfeld, Apfelberg etj.

“Mënyra më e shpejtë për të shpëtuar 19-vjeçen ishte ajo përmes derës së bagazhit”, ka thënë për mediat një drejtues i ekipit të zjarrfikësve.

Kosovarja e aksidentuar ka pësuar lëndime të lehta dhe është transportuar në spital për trajtim mjekësor, përcjell albinfo.ch. Rruga, si pasojë e aksidentit ka qenë e mbyllur përgjatë një ore.

(Foto: FF Apfelberg)

---