Kreu i qeverisë së Valisit kapet në restorant, përkundër masave të bllokimit

Kjo ka ndodhur në fund të shkurtit - megjithëse baret dhe restorantet aktualisht ende nuk lejohen për të pritur mysafirë

Restorantet ​​në gjithë Zvicrën vazhdojnë të jenë të mbyllura, por presidenti i Kantonit të Valisit, Christophe Darbellay, (CVP)  duket se nuk i merr shumë seriozisht kufizimet e vendosura për mbrojtje nga korona.

Siç raporton gazeta zvicerane frëngjishtfolëse “La Liberté”, Darbellay dhe kolegu i tij nga qeverita kantonale, Roberto Schmidt, kanë darkuar në një restorant që zyrtarisht ishte i mbyllur në Conthey (VS). Kjo ka ndodhur në fund të shkurtit – megjithëse baret dhe restorantet aktualisht ende nuk lejohen për të pritur mysafirë.

Ishte një takim privat dhe ne të katër darkuam në një dhomë bosh, thotë Darbellay, duke arsyetuar veten. Ndërsa për gazetën “Tages-Anzeiger”, Roberto Schmidt shkon në detaje: Ishte një takim me një simpatizant që gostiti ministrat kantonalë në restorantin e tij të mbyllur.

“Ne nuk e dinim që ai kishte restorant dhe ishim të befasuar kur na shërbeu drekën pas bisedës, e cila nuk ishte planifikuar dhe as dakordësuar”, thotë Schmidt, transmeton albinfo.ch. Ata vetëm më pas kuptuan se gruaja e simpatizantit kishte përgatitur ushqimin dhe prandaj nuk deshën të refuzonin mikpritjen spontane.

Por, ata duhej ta kishin ditur patjetër se: Sipas kërkesave ligjore, atyre u lejohej të hanin në restorant vetëm nëse pronari jetonte në të njëjtën ndërtesë – gjë që në këtë rast nuk ishte kështu, siç ka  sqaruar vetë Schmidt. Por kjo u kuptua vetëm pastaj, duke parë në retrospektivë, thotë Schmidt, i penduar për incidentin.

Si do të reflektohet kjo në votimet që do të mbahen të dielën

Ky rast bën bujë në Zvicrën perëndimore, edhe për faktin se nga ky kanton kanë qenë më të fuqishëm zërat drejtuar Këshillit Federal për të ndërmarrë veprime për tarracat e hapura të restoranteve. Vetë kantoni ka zbatuar në mënyrë rigoroze kriteret e koronës – dhe madje  ka raportuar një operator restoranti, sepse ai i kishte shërbyer mysafirëve.

Incidenti nuk besohet se do të ketë ndonjë pasojë ligjore për dy ministrat. Por ai për Darbellay dhe Schmidt, vjen në një kohë të papërshtatshme: Sepse të dielën Kantoni i Valisit zgjedh qeverinë e vet kantonale. Për dy të përmendurit nuk paraqitet probleatike vetëm çështja e  rizgjedhjes, por edhe e mbrojtjes së shumicës historike të CVP në qeveri së bashku me kandidatin Serge Godin.

---