Kriza politike shtyn vendimin për pagën minimale

Kriza politike në vend po vazhdon të shtrijë ndikimin e saj. Një ndër shtresat e prekura nga “anarkia” institucionale janë punëtorët që punojnë me paga të ulëta. Ata do të vazhdojnë të marrin paga të njëjta edhe për një vit në mungesë të përcaktimit të pagës minimale. Këshilli Ekonomiko-Social që do të duhej të propozonte pagën minimale, nuk ka arritur të takohej për të katërtën herë këtë vit për të dhënë propozimin. Këshilli pret kushte më të mira politike për të kërkuar vërtetim të garantuar të pagës minimale në nivel të shtetit.

Viti i ardhshëm, sipas anëtarëve të Këshillit, është koha kur vendi mund të ketë një Qeveri të re dhe me të mund të negociohej së bashku me sindikatën dhe punëdhënësit për vërtetimet ligjore të shumës reale në pagën minimale. Fadil Racaj, drejtor i Departamentit Ligjor në MPMS, thotë se këshilli ka paraparë që në mbledhjen e tij të katërt të dalë me propozim për pagën minimale por që situata e krijuar politike e ka pamundësuar atë. “Detyrë e Këshillit ka qenë të takohej katër herë në vit. Herën e katërt do të duhej të dilnim me propozim për Qeverinë për pagën minimale.

Por, fatkeqësisht kjo, siç duket nuk mund të ndodh këtë vit”, thotë Racaj.Në Kosovë, asnjëherë nuk është përcaktuar paga minimale. Por, për vitin 2011 kjo ka qenë obliguese edhe me ligjin e ri të punës që tashmë ka hyrë në fuqi. Në nenin 57 të këtij ligji thuhet se Qeveria e Kosovës në fund të çdo viti kalendarik përcakton pagën minimale sipas propozimit të Këshilli Ekonomiko-Social. Gjatë përcaktimit të pagës minimale, sipas këtij ligji, duhet të merren parasysh kostoja e shpenzimeve jetësore, përqindja e shkallës së papunësisë, gjendja e përgjithshme në tregun e punës, shkalla e konkurrencës dhe produktivitetit  në vend.